882/2026-2027

Aizawl, Dated 8th June, 2026: Vawiin khan Mizoram Secretariat, MINECO-ah “PALNA Anganwadi-cum-Crèche” chu Social Welfare & Women and Child Development Minister Pi Lalrinpuii chuan khuallianin hawnna hun a hmang.

Khuallian Pi Lalrinpuii chuan thu sawiin, Secretariat-a hnathawktu nu leh pa, a bik takin hmeichhe hnathawkten rilru ngaihngam tak leh hna leh chhungkaw enkawl kawp dan tha zawk nei chunga sawrkar hna an thawh theih nan he hmun hi siam a ni, a ti a. Minister chuan kum 6 hnuailam naupangte chu an taksa leh rilru nasa taka a than lai a nih avangin uluk taka enkawl an ngai a ni tiin, he crèche kaltlang hian naupangte hriselna, ei leh in, leh an hmasawnna kawng hrang hrang chhinchhiah zui zel a nih tur thu a sawi bawk. He hmun hian nu hnathawktute phurrit a chhawk ngei a rin thu a sawi a, crèche-a thawktu zawng zawngte chu theihtawp chhuah turin a chah a ni.

Minister chuan he hmalakna hlawhtlin nana thawktute chungah lawmthu sawiin, he crèche hi Mizoram chhunga Department dangte tan pawh entawn tlak a nih a beisei thu a sawi a. Ram hmasawnna tak tak thleng tur chuan naupang leh hmeichhiate dinhmun chawi kan leh ngaihsak thiam a pawimawh hle a ni, a ti bawk.

SWW&CD Department Commissioner & Secretary Pi Lalzarmawii chuan programme kaihruaiin khuhhawnna thu a sawi a. Mizoram pisa lian ber Secretariat-ah nu leh pa hnathawktute puitu tur nau enkawlna hmun pawimawh tak hawn a ni chu ni chhinchhiahtlak tak a nih thu a sawi.

WCD Director Pi Zoramthangi Chhangte chuan thu sawiin, PALNA Anganwadi-cum-Crèche chungchang thu sawiin, he scheme hi kum 2022 aṭanga Ministry of Women & Child Development (MoWCD) chuan Mission Shakti (Women Empowerment) hnuaia hnathawktu hmeichhiate tana a rawn duan thar a nih thu a tarlang a. The Maternity Benefit Act, 2017 angin hnathawktu mi 50 aia tam awmna hmunah crèche facility neih ngei tur a nih angin, MoWCD operational guidelines zulzuiin he hmun hi kalpui a ni dawn a ni, a ti. He hmun hi naupang kum 6 hnuailam enkawlna tura duan a ni a, Anganwadi hnai ber nena thlunzawm a nih angin naupangten nutrition, health check-up, leh chaw tha an dawn vek tur thu a sawi bawk.

Director chuan he Secretariat PALNA Crèche hi uluk taka duan a nih thu sawiin, enkawltu hran Management Committee siam a ni a, kalphung mumal tak nei nghal turin circular chhuah tawh a nih thu a sawi a ni.

He hunah hian SWW&CD Department, Directorate of WCD leh crèche thawktu ṭhahnem tak an tel thei a. SWW&CD Department Joint Secretary Pi Zonunthari chuan lawmthu sawiin hun a khar a ni.