736/2024-2025

LUNGLEI; the 10th, June, 2024: Vawiin chawhnu dar 2 khan Pi Lalrinpuii, Minister for Health & Family Welfare, Social Welfare, Tribal Affairs, Women & Child Development  leh Tourism Department  chuan a chenna in-ah YMA Sub-Hqrs, Lunglei hruaitute a kawm.

He inkawmnaah hian YMA Sub-Hqrs , Lunglei President Pu K. Lalfakzuala chuan  Minister Pi Lalrinpuii'n  YMA Sub-Hqrs, Lunglei hruaitute nen a inkawmna hun tha tak siamsak a nih avangin lawmthu a sawi a.  March ni 22, 2024 khan YMA Sub-Hqrs, Lunglei Rorel Inkhawm an nei a, chuta thu pawimawh tak tak leh chhim lam mipui tana tul leh pawimawh relte Minister hnena an thlente hi a theih ang ang a lo bawhzui sak turin an ngen a ni. Chung an thu thlente chu:  Lunglei khawpui chhung tih zau nan Lunglei chhuah lamah hian kawng siam tura hmalak te, YMA Park Mualthuam 'N' a mi hi project lian tham deuha hmalak te, YMA ram Pukpui-ah hian Youth Hostel sak dan ngaituah te,Kawrpui leh Khawthlangtuipui, Khojoisuri leh Malsori khua inkar hi buh bal thar nana ram tha (Potential Area) a ni a. Mizo chhawr theih turin sawrkarin chei bawl se tih te a ni a. Heng bakah hian Home Science zirna College Lunglei a dah, Lunglei Town chhunga Hydrant siam belh, Mipui hmantur Hall lian tha neih leh ATL Road, Lunglei District chhung tih hmasawn te an thlen bawk a ni.

Minister Pi Lalrinpuii chuan YMA Sub-Hqrs, Lunglei hruaitute nen inkawmna hun tha tak an nei thei chu lawmawm a ti a, YMA Sub-Hqrs, Lunglei hruaitute thu thlen te chu a thawhpui MLA te nen theitawp chhuaha an bawhzui sak  tur thu a sawi a. Kumin October thla-ah hla  phuah lama hma kan sawn theih nan Lunglei-ah Music Festival buatsaih anih tur thu sawiin; Lunglei Civil Hospital tihchangtlun nan Specilist dah leh ICU hman theih tura hmalak bakah Health Care lam pawh chak taka hmalak a nih tur thu a sawi bawk.

Minister Pi Rinpuii hi Lunglei South bialtu MLA Pu Lalramliana (Papuia) chuan a tawiawm a ni.