624/2026-2027

Saitual, the 20th May, 2026: Vawiin khan Govt. Saitual Higher Secondary School Building-ah Prof. Lalnilawma, Minister of State, RD, PHE, etc chuan Govt. Saitual Higher Secondary School-a zirlai pass tharte hnenah lawmpuina a hlan.  

He hunah hian Prof. Lalnilawma chuan zirlai pass thar zawng zawngte chu thinlung taka a lawmpui thu a sawi a, class 12 pass hnuah hma lam hun tak tak a intan chho dawn a ni, a ti. Minister chuan nu leh pate leh zirtirtute zara hlawhtlinna chang an ni tih hre thar leh turin zirlaite chu a chah a, an thil tih apiangah theih tawp chhuah turin a fuih bawk a ni.  

Prof. Lalnilawma chuan harsatna atanga chhel taka nun zir chho turin leh rual elna tisang zel turin zirlaite chu a fuih a, ni khatah darker 24 theuh kan neih thu tarlangin, a hmang thiam apiangin hlawhtlinna an chang dawn a ni tih a sawi. Minister chuan a bial mipuite tan zirna kawngah theih tawp chhuah a inhuam thu a sawi a, zirlaite chu an kal lehzelna turah hlawhtlinna an chan theih nan a duhsakna a hlan nghal a ni. 

Govt. Saitual Higher Secondary School-ah hian Arts stream-ah zirlai naupang 56 awmin 51 an pass a, pass percentage hi 91.07% a ni. Science stream-ah hian zirlai naupang 24 awmin,  18 an pass a, pass percentage hi 75% a ni.Commerce stream-ah hian zirlai naupang 19 awmin 18 an pass a, pass percentage hi 94.73% a ni. 

Vawiin inkhawmah hian Pu Laldailova, UDC chuan hunserh a hmang a, Pu VL. Felfamkima, Principal, Govt. Saitual Higher Secondary School chuan inlawmna thu sawiin, khuallian Minister Prof. Lalnilawma, Pu K. Lalhriata, Lecturer leh sawm bikte hnen atangin thusawi ngaihthlak a ni bawk. Lawmpuina inhlanna hun hi Pu H. Lalhmangaihzuala, Lecturer leh Pi C. Lalbiaknungi, Lecturer ten an kai hruai a, Pu Zohmangaiha Tochhawng, Lecturer in lawmthu sawiin hun a khar a ni.