4116/2025-2026

Saitual, the 22nd January, 2026: Vawiin khan Saitual Joint VC Sitting Hall-ah, Prof. Lalnilawma, Minister of State, Tawi bialtu MLA ni bawk chuan KTP General Conference 2026 Saituala hman tur pualin Organising Committee te leh khawtlang hruaitute a kawm a, an mamawh bungrua te a pe nghal bawk a ni.

Minister chuan Organising committee hnenah Silpauline bundle 10 a pe a, hei bakah hian hmalakna tur hrang hrang te tarlangin, MGNREGA, MC atangin field luhka, zun in, electric ban, chhim lam step railing siam te, a bula lungphun hmun danga sawn bakah gallery rawng hnawih thar tur a nih thu te a sawi. Minister chuan khawpui chhung cheina tur UD&PA atangin ₹1.5 crore tihfel hnaih a nih thu sawiin, khawchhung kawng 3rd Road zawmna, NEC road siamthatna tur sum te pawh a chhuah hnaih tawh thu a sawi a, MLA fund atangin buhfai man tlawm zawka lei theih a nih tur thu a tarlang bawk a ni.

Vawiin thutkhawm zawhah Minister chuan pandal chu KTP General Conference Organising Committee te nen a hmunah an enho a, hma lak ngaite bawhzui dan tur te an sawiho nghal a ni. Minister chuan High School tlanga reservoir tanky litre nuaih 4 dawng siam mek chu a tlawh nghal a, SASCI hnuaia Saihmar Tlanga Circuit house sak mek leh Vanapa khawthlir te a tlawh bawk a ni. Vanapa Khawthlirah hian kum 2014 khan Saitual Joint YMA chuan chawlhbuk an siam a, a panna kawng hi kum 2024 khan MLA fund hmangin laih a ni bawk. Minister hi Pu Lallawmawma, Addl. DC, Pu V. Laldinsanga, PD, DRDO, Pu Lalpektluanga, Sr. EE, PHED, Pu Lalzuala Sailo, SDO, PHED, VC member te leh khawtlang hruaituten an tawiawm a ni.