1007/2026-2027

Dated June 15th, 2036 : Vawiin khan Minister Prof. Lalnilawma chuan a bial chhung khaw pahnih - Mualpheng leh Lenchim ah te YMA day a hmanpui. MLA fund cheng nuai 14 hmanga sak Mualpheng Branch YMA Run a hawng a ni.

Minister hian Mualphenga hun a hman zawhin Lenchim Branch YMA Golden Jubillee lung a hawn bakah Jubillee dar vuain YMA Day Programme hman zui a ni.

Minister Prof. Lalnilawma chuan YMA Day pual thu a sawinaah khawtlang tana YMA hlutna leh hmalakna tangkai tak takte a sawi a. Ruihhlo do kawnga YMA hmalakna chu fakin, 'kan ram leh hnam boral loh nan ruihhlo leh a kaihhnawih lakah YMA member te kan fihlim mai ni lovin, a that loh zia midang zirtirtu kan ni tur a ni', a ti. Minister chuan zirna lama hmasawn zual zel a pawimawh thu a sawi bawk.⁠ Taimak, huaisen leh rinawm hi hlawhtlinna bul a ni, a ti. 

YMA in huang lo a neih loh thu Minister Prof. Lalnilawma chuan sawiin, ruihhlo do kawngah a ni emaw, ram hmasawnna hnathawh kawng ah a ni emaw, midang tanpuina kawng a ni emaw, kawng engkimah YMA hian huang lo a neih loh thu a sawi a. Ram leh hnam humhalh leh siamthatna kawng ah YMA in theihtawp a chhuah thu a sawi bawk.

Lenchim Branch YMA hi kum 1976-a din a ni a,  tunah hian Section pahnih; Khuangchera Section leh Taitesena Section-ah te inṭhenin Member 294 an awm mek.