2557/2026-2027 

Kolasib, 7th October, 2026: Revenue Minister Pu B Lalchhanzova chuan vawiin khan Kolasib a Revenue Department hmalakna hrang hrangte a hmunah tlawhin a enfiah.

Vawiina  Revenue Minister in Kolasib District a hun a hmanna ah hian vawiin chawhma dar 11:00 khan Project Veng, Kolasib-ah Assistant Commissioner (Revenue) Quarters thar a hawng a. He hunah hian Deputy Speaker Pu Lalfamkima chu khual zahawm a ni a, Kolasib Bawrhsap Pu H. Dolianbuaia chuan inkhawm hi a kaihruai a ni.

Assistant commissioner Quarters hawnna ah hian Khuallian Minister Pu B. Lalchhanzova chuan thu sawiin, Revenue leh District Administration (DC) kal hrang chu thil fuh lo tak a nih thu a sawi a. Minister a nih tirh khan Revenue Assistant Commissioner (Aizawl North leh South) thendarh a nih thu sawiin,  Champhai-ah pawh Assistant Commissioner Office thar hawn thuai a nih tur thu leh  Thenzawl ah pawh sak tura peihfel a nih thu a sawi. "Revenue hi hmuh theih leh langsar takin awm lo mah se, ram hmasawnna tura lungphum pawimawh tak a ni a. Hna kan chelh tawh chuan a thiam (expert) te ngaihtuah dan anga  kan thawh a ngai a ni," a ti. Land Pooling System hmanga sorkar leh ram neituten tangkawpa hmunhma an tihhmasawn theih nan ngaihtuahna sen a pawimawh thu leh, Revenue Department ah chuan a chung lam atanga ruahmanna siam tawp aiin district level atanga sorkar finchhuah a pawimawh thu a sawi bawk. "Eng department pawh enkawl ila, kan thawh chhan chu mipuite rawngbawl hi a ni a. Kan vai hian department hrang ni mah ila, inzawmkhawm leh inmamawh tawn vek kan ni," tiin kalkhawmte a chah.

Khual zahawm, Deputy Speaker Pu Lalfamkima pawhin thu sawiin, ZPM Sorkar inrelbawl tirh kum khatna chu sorkarin leiba rulh leh insiamrem nan a hman thu a sawi a. "Chuti chung chuan hmasawnna kan hmu nasa hle a. Kolasib District-ah pawh hun reilote chhungin sorkar hmalakna hmuh tur a tam a ni," a ti. Diakkawn Bazar leh Venglai Bazar-te pawh sak that tura ruahmanna awm tawh a nih thu leh, Pangbalkawn atanga South Chhimluang kawng siamna tur tender kalpui mek a nih thu a sawi. Hemi rual hian Nl. Lalremsiami hming chawia hockey ground siam tur chungchang pawh a sawi lang bawk.

He hunah hian Pu Vanlalmawia, Land Revenue & Settlement (LR&S) Secretary, FCS&CA Director Pu Lalthazuala leh LR&S Director Pu Lalhmansanga te hnen atangin thusawi tawi ngaihthlak a ni a. PWD Department atangin Technical Report ngaihthlak a ni bawk. Report-a tarlan a nih danin, Construction of Settlement Officer Quarters (Type-IV) at Kolasib hi cheng nuai 66.87 senga sak a ni a. Hna hi October 1, 2025-a tan niin, thla 12 chhung in thawh zawh a ni.

Inkhawm hi Pi Lalvenhimi Ralte, Assistant Commissioner (Revenue) in lawmthu sawiin a khar a. He hun hman zawh hian Minister leh a tawiawmtute hian Kolasib-a Revenue Department hmasawnna hna thawh mek leh thawh zawh tawhte chu a hmunah kalin an tlawh nghal a ni.

Minister Pu B. Lalchhanzova hian Assistant Commissioner (Revenue) Office, Kolasib pawh tlawh nghal in Office hmunhmate a enfiah a, department thawktute nen inkawmhona hun tha tak an hmang a ni. Minister chuan thawktute chu mipuite tana rawngbawltu an nih hre thar leh tur leh, mipuite tana dawr nuam leh awlsam ni tura tan la turin a fuih a. Revenue hna chu ram hmasawnna atana ban pawimawh tak a nih avangin, rinawm leh taima taka hna thawk theuh turin a chah a ni.

Hemi hnu hian Minister chuan Vairengte pan nghalin, Vairengte SDO (Civil) hnuaia Revenue hnathawh tichak tura ruahmanna kalpui mekte a hmunah a endik a. Vairengte SDO (Civil) office-a Revenue staff-te awmna tur leh Record Room sakna tur hmunhma te chu Revenue Department hotute leh PWD Chief Architect official-te nen an en ho a. Vairengte Bazar hmuna Revenue staff quarters sakna tur ruahmanna pawh a hmunah enfiahin, a sak dan tur drawing leh plan-te uluk taka enin an sawiho bawk a ni.

Vairengte a tlawhnaah hian Minister Pu B. Lalchhanzova chuan Land Revenue & Settlement (LR&S) Department in mipuite tana banphak leh awlsam zawk an ngaihtuah thu sawiin, "District Headquarters piah lamah pawh SDO (Civil) thut hmun zawng zawngah Revenue thuneihna  pek vek a, Revenue office changtlung taka siam vek tum a ni," a ti a. Hemi piah lamah hian khaw tam zawkah Village Revenue Officer (VRO) dah tum a nih thu sawiin, hei hi Election hnuaia BLO-te kalphung ang deuha duan a nih tur thu a sawi bawk. Heng hmalaknate enchhin nan (pilot project) hian SDO (Civil) thut hmun pahnih, Vairengte leh Thenzawl te chu thlan an nih thu a sawi lang bawk a ni.

Revenue Minister in Kolasib District a tlawhna ah hian Pu Lalfamkima, Deputy Speaker, leh Kolasib DC leh Kolasib Sawrkar official sawm bikte bakah Aizawl atangin Revenue Secretary leh Director ten an tawiawm a ni.