335/2026-2027

Saitual, the 30th April, 2026 : Ni 3 awh YMA Sub-Headquarters Saitual Inkhawmpui vawi 3-na chu “Ruihhlo do” tih thupui hmangin Lal Hrangchhuana Run, NE Khawdungseiah neih a ni a, nizan khan Pu B. Lalchhanzova, Minister of State chu khuallian niin hun a hmanpui.

He hunah hian Minister Pu B. Lalchhanzova chuan thu a sawi a, YMA Sub-Headquarters Saitual Inkhawmpui vawi 3-na an hmang thei chu lawmawm a tih thu sawiin, NE Khawdungsei panna kawng pawh tha a tih thu a sawi a, ram hmasawnna hmel hmua a inhriat thu a sawi bawk.

Khuallian chuan YMA chu Mizo hnam phuar khawmtu leh hnam lungphum pawimawh tak a ni, a ti a, he inkhawmpuiah hian Saitual District-a YMA member te inpumkhatna leh tanrualna a lang chiang hle tih a sawi. YMA chu ramngaw, nungcha leh lui humhalh kawngah pawh hma lain, khawtlang nuna thil tha lo, ruihhlo leh eirukna do kawngah pawh theih tawp an chhuah thin tih a sawi a, YMA chu chhawm nung zel turin kalkhawmte chu a fuih nghal bawk a ni.

Minister chuan hnam anga kan ropuina kan chhawm nun zel theih nan pun chak kan mamawh tih sawiin, nupui pasal innei hma tura infuih thar a tul a ni, a ti a. Thalaite chu an taksate ruihhlo bawiha pe lo tur leh mahni inkhawngaihna dah thaa hma lam pen zel turin a fuih bawk a ni. Khuallian chuan YMA Sub-Headquarters Saitual Inkhawmpui hmang tura kalkhawm zawng zawng te chu duhsakna hlanin, SYMA hnenah inkhawmpui tanpuina a hlan nghal bawk a ni.

Zanin YMA Sub-Headquarters inkhawmpui hi Pu R. Lalruatkima, President, SYMA chuan a kai hruai a, Pu Zosangzela, Treasurer, Tamdil Group chuan hunserh a hmang. Khuallian Minister Pu B. Lalchhanzova chuan thu sawiin, Pu Lalnunsanga Khawlhring, CF (EC & NC) chuan ramngaw humhalh pawimawhzia a sawi bawk a ni. Ruihhlo donaa ti tha leh ramngaw leh nungcha humhalh kawnga ti tha YMA Branch te hnenah lawmman pek nghal a ni bawk.

NE Khawdungseia YMA Sub-Headquarters Saitual Inkhawmpui hi April ni 28 atanga April ni 30 thleng neih tur a ni a, he inkhawmpuiah hian vantlang inkhawm, rorel inkhawm, hruaitu inthlan leh cultural programme te neih a ni dawn a ni.