804/2024-2025

Champhai, the 13th June, 2024: Animal Husbandry & Veterinary (AH&Vety.) Department, Local Adminstration Department (LAD), Art & Culture (A&C) Department leh District Council & Minority Affairs (DC&MA) Department-te changtu Minister Pu C. Lalsawivunga chuan vawiin tlai khan Champhai thlengin District AH & Vety. Hospital, Office leh CHAMUL hmunhma bakah ran talhna slaughter house-te tlawhin a enfiah a, vety. department thawktute a kawm bawk.

A.H & Vety. Minister Pu C. Lalsawivunga chuan ran chawa intodelh tura hmalak chu sawrkar ngaihpawimawh hmasak a nih thu sawiin, ran chaw siam nana pawimawh tak vaimim leh bekang ching kawpa pilot project kalpui turin Saitual leh Champhai District thlan a nih thu a sawi a. Kuthnathawktute atangin sawrkarin ran chaw siamna tur hmanrua, support price siama leisak a tum thu sawiin, Mizorama kuthnathawktute'n a hlawkna an tel theihna tur ngaihtuah a ni, a ti a. Rokhawlhna avanga District Veterinary Hospital thar tur sak zawhfel loha awm mek chu puitlin a nih theih nan ngaihtuahna sen mek a ni, a ti a. Champhai District Milk Producers’ Co-operative Union Limited (CHAMUL) hluihlawn tawh thar thawh leh tura hmalakna fakawm a tih thu a sawi a. Slaughter House Champhai building leh hmunhma tha tak chu tangkai zawka hman a nih theih nan ngaihtuahna thar senga hmalak a tul thu sawiin, project hlawhtling thei tur leh mamawh ang chauh siama theihtawp chhuaha bawhzui a tul thu a sawi bawk.

Pu C. Lalsawivunga hi District Bawrhsap Pu James Lalrinchhana, District Animal Husbandry & Veterinary Officer (DAH&VO) Dr. B. Lallawmsanga leh Official dangte'n an lo dawngsawng a. Aizawl atangin Dr. Robert Rualthankhuma, Dy. Director (LH), AH&Vety. Department, Pu Vanlalhuma Singson, Archaeologist, Art & Culture Department leh Official dangte'n an tawiawm a ni.