4973/2025-2026

Champhai, dated 24th March 2026: A.H. & Vety. Minister Pu C.Lalsawivunga chuan vawiin khan District Vety. Hospital, Champhaiah National Livestock Mission hnuaia Livestock Insurance programme a hawng a, Mizoram Banakaih kaltlanga ranchaw intodelhna project ‘Maize and Soyabean contract farming for Animal Feed Production’ hnuaia vaimim chi sem tur a vailiam.

Minister Pu C. Lalsawivunga chuan vaimim leinan Department-in sum tam tak a seng thin a, duhkhawp a hmuh thin loh avangin state hrang hrang bakah, Burma atang te a lakluh a nih thin thu a sawi a. Vaimim hi Department in a mamawh reng avang leh market awmsa a nih avangin, Mizo kuthnathawktu te kaltlanga an harsatna te sutkian theih a nih thu a sawi a, he project atan hian Banakaih hnuaiah ₹408 lakhs hmuh a ni a, district pathum Champhai, Saitual leh Khawzawla khaw 10-ah kalpui tum a ni a, loneitu chhungkaw 464 in vaimim tharchhuah runpui an kalpui dawn tih a sawi. Mizoram hi ranvulh atangin kan intodelh thei reng a, intodelh thei turin mi tinin tan kan lak a ngai tih a sawi. Mahni hnaa rinawmna hi a pawimawh em em a, rinawmna hian taimakna te, thawhrimna te leh dikna te a keng tel vek a, kuthnathawktute pawh an hnathawhna apianga rinawmna neia, rinawm taka hna thawk turin a chah a. Bekang leh vaimin an semchhuah te pawh tha taka thar chhuak turin a chah a, Mizoram mipuiin mamawhna sang tak an neih vangin an thawh that chuan an hlawkpui ngei ang tih a sawi bawk. Animal insurance pawh ran vulh te tana thlamuanna siamtu tha tak a ni dawn a, insurance man pangngai aia tlawm daihin an nei thei dawn lehnghal a, an vanneiin an chang tha hle a ni tih a sawi a, an hman tangkei ngei turin duhsakna a hlan a ni.

Vawiina loneitute tana vaimim chi vailiam zat hi quintal 38.29 a ni a, he project hi kum hnih chhung kalpui tur a niin a tum ber chu ranchaw atana vaimim mamawh mizo loneitute kaltlanga tharchhuah a ni. Department of Agriculture te nena hmalak ho niin vaimim tharchhuah hi A.H. & Vety. Dept chuan Kg ah ₹28 in loneitute kawtkaiah a leisak thin dawn a ni. A.H. & Vety. Dept chuan vaimim hi Deparment feed plant-ah thla tin quintal 500 vel mamawh a nih thin thu an sawi a, he project atang hian quintal 8200 tharchhuah beisei a ni.