1063/2024-2025

Aizawl, the 4th July, 2024: Zirlai ni chunga mahni intodelh tum pawl, Students' Self-Support Union (SSU) buatsaih zirlaite tana intodelh beihpui thlakna leh zirlaite an kalna awm kawng kawhhmuhna hun vawiin chawhma dar 10:00 a Vanapa Hall-a neih chu Art & Culture Minister Pu C. Lalsawivunga chuan khuallian niin a hmanpui a, PMU, PHED leh SSU Gen. Hqrs. buatsaih lehkhabu 'Duhthusam Ram' Volume-I chu a tlangzarh nghal bawk.

Khuallian Pu C. Lalsawivunga chuan Students' Self-Support Union-te hmalaknaa zirlaite tana pawimawh tak intodelhna leh nakin zel atana kalna awm kawng inkawhhmuhna hun buatsaih a ni chu lawmawm a tih thu sawiin, SSU din a nih dan leh tun thlenga zirlai harsa zawkte tana mumal taka hma a la chhunzawm zelte chu fakawm a tih thu a sawi a. Intodelh thupuia nei Students' Self-Support Union-in thawhhreh pawh nei lo hruaitu entawntlak tak tak an nei thin chu vawiin ni thlenga tha taka an kal theih chhan a ni, a ti a. Mahni intodelh tur leh chhungkaw enkawl nan hna hnuaihnung leh zahthlak a awm loh thu sawiin, SSU te'n an nunpui tlat chu chhuanawm a tih thu a sawi bawk.

Art & Culture Minister chuan state puitling kan nih hnuah hmasawnna tam tak hmuh a nih tawh thu leh intodelh leh hmasawn tura tanlak erawh a la ngaih nasat thu sawiin, sum leh pai leh ei leh bara intodelh turin tun atangin bultan a ngai a, hei hi zirlaite'n hriaa thupuia hmanga tan an la chu lawmawm a tih thu a sawi a. Mizo kutchhuak leh thar chhuahte hnualsuat mai lova chawilara ngaihsan nachang hriat a tul thu sawiin, hei hi intodelh beihpui thlak kawnga pawimawh hmasa a ni, a ti a. Sawrkarin hand holding policy hnuaiah thalai entrepreneur-te a ngaihpawimawh thu leh mahni kutkea din tumte tan a inhawn reng thu a sawi a. Zirlai kalkhawmte chu hmasawnna kawng dika kan ramin ke a pen theih nan pass ringawt duh tawk lova, thiamna tak tak neih tum zawk tura chahin, hmasawnna kawng dik zawh turin zirnaah hma kan sawn a ngai hle a ni, a ti a. Zirlaite chu Pathian tih chunga lehkha zir tur leh nu leh pate thu awih tura chahin, Mizoram chhung maia hna zawng lova India ram pum huap hna lak lian tak taka lang thei tura rinawm leh taima taka lehkha zir turin a fuih nghal bawk.

He hun hmanpuitu Er. H. Duhkima, Director, Project Management Unit (PMU), PHE Department chuan zirlai kalkhawmte chu tum bulbal tak nei tur leh tum ram thleng tura taimakna leh tumruhna nei turin a fuih a. Khawvel changkang leh hmasawn zel kentel zirlai puitu hmanraw tha tak takte chhawr tangkai tum tura a fuih rualin internet chu zirlai puitu piah lamah rinrawla neih tum lo tur leh lehkhabu tha tak takte rinrawla neia chhiar tam zawk turin a chah a. Insiamrem thiam a pawimawh thu leh hun hman dan siamrem thiam apiangte'n hlawhtlinna an chan thin thu sawiin, kalkhawmte chu an zirlai tibahlah chuang lova chhungkua leh khawtlang tana mi tangkai nih tum turin a sawm a. Ram leh hnam hmangaihna nena theihtawp chhuaha lehkha zir turin a fuih nghal bawk.

Thusawitu dang SSU Gen. Hqrs. President Tv. Darhmingliana chuan hnathawh tur leh inhlawhnate zawnga intodelh tura hma an lak thin thu leh zirlai harsa zawkte SSU kaltlanga puih an nih thin dante tarlangin, zirlai ni chunga intodelhte hnenah kum tin Rs. 20,000/- leh citation kengtel self support award an pek thin thu a sawi bawk.

He hun hi Nl. Lallawmzuali'n kaihruaiin Tv. Gordon C. Vanlalhruaitluanga, Jt. Secretary, SSU Gen. Hqrs-in report pein kalkhawmte inhmelhriattirna hun a hmang a. Lehkhabu tlangzarh tur kamkeuna Tv. James Ramdinmawia. Adviser, SSU Gen. Hqrs. & Chairman, Zamzo Real Estate-in a nei a. Lehkhabu ziaktute hnenah thilpek hlan a ni a. Tv. Rinsangzela, i/c Property Secretary-in lawmthu sawiin hun hman hi a khar a ni.

Hun hnihna Tv. Benjamin J. Malsawmdawnga, Secretary General, SSU Gen. Hqrs. kaihhruaiin hman chhunzawm a ni a, he hunah hian sawm bik mithiam Tv. J. Lalramnghaka. Adviser, SSU Gen. Hqrs., Pu Lalrinawma Khiangte, MCS, Private Secretary to CM, Prof. Lalhriatzuala, HoD, Physics, Pachhunga University College leh LESDE Department, Govt. of Mizoram atangtein zirlaite hriattur pawimawh tak takte ngaihthlak a ni a, zawhna leh chhanna hun hlawkthlak tak hman a ni.

Students' Self-Support Union (SSU) hi kum 1985, May ni 27 ah Hrangbana College-ah din niin kum 39-na hmel a hmu tawh a. Kum tin assembly an nei thin a, zirlaite intodelh nan campaign an kalpui thin bakah zirlai ni chunga intodelhte hnenah kum tin self support award an sem thin a. Rising Day-ah blood donation camp an nei thin a, heng bakah hian zirlaite intodelh leh hlawhtlin theih nan kawng hrang hrangin hma an la thin a ni.

PMU, PHE Department leh SSU Gen. Hqrs. tangkawp buatsaih lehkhabu tlangzarh tak Duhthusam Ram, zirlaite eizawnna awm kawng kawhhmuhtu Vol-I ah hian mithiam tak tak te'n topic hrang hrang hmangin zirlaite tana hriattur pawimawhte an ziak a. Colour vek page 106 a chhah a ni a, copy 15000 chhut chhuah niin Rs 100/- man a ni.