3837/2024-2025

Saitual, the 16th January, 2025: Vawiin khan Commerce & Industries Minister Pu F. Rodingliana chuan National Handloom Development Programme hnuaia puantah tanpuina semna hun Teikhanga neih chu khuallian niin hun a hmanpui. 

He hunah hian khuallian chuan thu sawiin, Commerce & Industries hnuaia scheme hrang hrang atanga mipui chhawr theih te chu a tarlang a, mipuite chu an pawisa dawn leh thil dawnte atanga theih tawp chhuah a, hlawhtlinpui ngei tura hma la turin a fuih nghal a ni. 

National Handloom Development Programme-ah hian hamthatna dawngtu (Beneficiary) te chuan puan tahna in sak nan Cheng Rs 1,20,000 theuh an dawng ang a, 1st installment atan Rs 50,000 dawng hmasa phawtin installment dang hi nidangah an la dawng leh dawn a ni. Ṭanpuina semna hun hi Pu V. Laldinsanga, DCIO, Saitual chuan a kaihruai a ni. 

Teikhang a hun a hman zawh hian Minister Pu F. Rodingliana chuan Hrianghmun panin, ama mimal pawisa aṭanga a lei bus chu Hrianghmun sikul naupang te tan a pe a, he bus hlanna hun hi VC house kawtah neih a ni.  Minister hian Mimbung leh Kawlbem te pawh a tlawh a, khawtlang hruaitute nen inkawmna an nei a ni.