No.1489/2020-2021 

Minister of State Pu K.Lalrinliana chuan vawiin khan Tuipui D leh Hnahthial tlawhin a department enkawl Food Civil Supplies & Consumer Affairs leh Fisheries hmun te bakah LAD ram tura ruahman te enfiahin District tih changtlung kawngah theihtawp chhuah mek a nih thu a sawi

Fisheries Minister Pu K.Larinliana chuan Tuipui D Sangha humhalhna hmun enfiahin Luidung nungcha humhalh kawngah an hmalakna chu fakawm a tih thu leh Sorkar pawhin a hriatpui thu sawiin "In Sangha humhalh en tura lokal mikhual te chawlhbuk tur sa turin ruahmanna kalpui mek a ni a, hun reilo te ah sak tan thuai a ni ang. Hun remchangah Sangha Kutpui  buatsaih dan te pawh ngaihtuah tlang ila a tha khawp mai"a ti

Hemi hnu hian Minister Pu K.Lalrinliana chuan Hnahthial tlawhin District Bawrhsap Pu Vanlalmawia chuan a  chenna Bungalow-ah lo dawngsawngin Sorkar Office hotute leh khawtlang hruaitute nen inkawmhona an nei nghal a, Hnahthial District bawrhsap Pu Vanlalmawia chuan Minister Pu K.Lalrinliana'n a hun chep tak karah Hnahthial District tih changtlunna tura a department enkawl hmunhma te a enfiah chu lawmawm a tih thu a sawi a ni.

Minister Pu K.Lalrinliana chuan District thar pathumte ti changtlung zel turin sorkar-in ruahmanna hrang hrang a kalpui thu sawiin a department enkawl FCS&CA, Fisheries, LAD Office tur leh Quarters turte pawh buaipui mek a nih thu te, Hnahthial Godown kawt pawh siamthat thuai a nih tur thu leh Legal Metrology pawh a takin function tir ala  nih dawn thu a sawi bawk a ni.