No.1462/2020-2021

FCS&CA, LAD leh Fisheries te changtu Minister Pu K. Lalrinliana chuan vawiin khan Lunglei District Tlabung Sub Division huamchhunga Bangladesh ramri hrul khua te tlawhin Border area-a venhmina kalpui dan leh helai hmuna Khawthlangtuipui Group YMA Covid-19 duty post te a hmunah kalin a enfiah a, duty te nen inkawmhona hun hmangin an mamawh tur hrang hrang - medical & disaster response supply - te, silpauline leh pawisa fai te a hlan a ni.

Minister hi Lunglei atangin HPC Vice Chairman Pu Lawmawma Tochhawng, sawrkar official-te leh party hruaituten tawiawmin Tlabung ah West Tuipui Assembly Constituency bialtu MLA Pu Nihar Kanti Chakma hovin Tlabung SDO(C) Pu Lalsanglura leh official dang - te leh khawtlang hruaitute leh tlawmngai pawl aiawhten an lo hmuak a ni.
Supply Minister leh amah zuitute hian Tablabagh leh a chhehvel ah te Covid-19 Duty post leh border fencing-te tlawhin ramri venhmina hi a hmunah uluk takin an enfiah a. Helai hmuna inkhawm tawi neihah Minister chuan lockdown avanga harsatna hrang hrang awm thei sawrkarin a ngaihven reng tih sawiin chuti ang harsatnate chu a hmuna zirchiang tura thawk chhuak an nih thu a sawi a. Covid-19 hrileng mekin engtik thleng nge a awh dawn a hriat lohva, kan hnaivai maia awm State leh ram dangah te a pung zel a, kan fimkhur lehzual a tul takzet a ni, a ti.
VLTF-te leh YMA leh YCA volunteer-te inpekna leh thawhrimna fakawm a tih thu sawiin an chungah lawmthu a sawi a, Covid-19 do zel tura kawng engkima hmalak pui chhunzawm ah a sawm bawk. Ram venhim nana khawtlanga lungrual taka thawhhona awm thin chu lawmawm a tih thu sawiin Minister chuan Covid-19 chu inkaichhawn awlsam tak anih avangin ramri venhim hnathawktute chu tha thlah lova uluk leh fimkhur taka duty chhunzawm zel turin leh an mamawhte sawrkarah thlen vat thin turin a chah a ni.

Khawthlangtuipui Group YMA hnuai–ah hian YMA branch Pali (4) - Tlabung Branch, Zodin Branch, Chawnpui Branch leh Chawilung Branch-te an awm a. Tlabung branch te hi Tablabagh, Balukia lei leh Bakmara lei te leh Hudusora leihlawn hnuaiah te camp an siam a, YCA Tablabagh leh YCA Kalapani te nen tang hovin riah buk an siam a. Tin, meilawng hmang a duty kal kual reng a ni bawk. Zodin Branch te hi Lamthai- 1 ah in kulh in, Bindasora khua Border fencing pawn a awm te leh Bangladesh lam inkalpawhna vengin an rammu a, meilawng hmang a duty vah kual reng a ni bawk. Chawnpui Branch te hian Tipperaghat Village Council hnuai a, Jaruldubaaora khua ah an Rammu a. Chawilung Branch te hian Khojoysury Village Council hnuaia Chondobighat fencing Gate No. 13-14, 14-15 inkar ah te riahbuk sualin YCA Khojoysury te nen ramri an veng bawk a ni.

Riahbuk sual zawng zawng hi Khawthlangtuipui Group YMA in hmanrua a ngaihtuah a, mi thil phal te thil pek dawn atangin ei leh in pawh hi YMA leh YCA ah te sem thin a ni.

Tin helai duty-te hian CM Relief fund, YMA Mission veng Branch, Aizawl, Mission vengthlang, Aizawl khawtlang, Upper Republic Aizawl VLTF & YMA te, Kulikawn Aizawl VLTF & YMA te, YMA Chanmari Branch Lunglei te, YMA Rahsiveng Lunglei te, Royal Knight Lunglei te leh Bethel Centre Lunglei te hnen atangin tanpuina sumfai leh thilpek te an dawng tawh a ni.

Tin, vawiin vek khan Supply Minister hian a khaw kalna ahte hian FCS&CA Godown-te tlawhin buhfai stock dinhmun te a enfiah nghal bawk a. Lungsen godown ah buhfai quintal 2440 stock awm mekin Tuichawng godown ah quintal 1790 a. Stock awm mek hian July thleng an daih tur thu godown hnathawkte hian an report a ni.