844/2024-2025

Aizawl, 17.6.2024: Minister for Home, UD&PA, etc. Pu K. Sapdanga chuan vawiin khan Aizawl Smart City Ltd. Leh SIPMIU hnuaia hmalakna thenkhat a hmunah kalin a enfiah. Minister hian City Centre, Dawrpui te, Multipurpose Ground, High Field te, 37 MLD Water Treatment Plant, Setlak te, Solid Waste Management Centre, Luangmual, Plastic Waste Management Centre, Luangmual leh Tuivamit Playground te tlawhin, hnathawh dan chik takin a enfiah a ni.

City Centre, Dawrpui hi bungraw lakluhna duh angin a awlsam loh avangin hmalakna a chak theihloh thu thawktute'n an sawi a. Chutihrual chuan mipui mamawhna hria in, theihtawp chhuah a, mipuiin an chhawr thuai theih tura hma lak an tum thu an sawi.

Minister hian Cyclone Remal avanga Tlawng tuilian in 37 MLD Water Treatment Plant a tihchhiat hnuhma te chu enfiah a. He water treatment plant hian April 27, 2024 atang khan Laipuitlang tuizem lian ah nitin tui thianghlim litre maktaduai 10 MLD a pump chho tan a ni. He project hian Laipuitlang tuizem lian in a chawm veng hrang te hnenah a tui a mamawh ang zelin tui a lo pump chhuak tawh thin a. Cyclone Remal avangin Raw Water Pump House chu nasa takin tuilianin a chimpil a, tui pump khawl thuai virtu electric motor 3 leh control panel, sensor leh thildang engemawzat a tichhia a ni. Heng khawl rit tak tak leh hnawmhnawkin a bawh mai bawk ah a panna kawng a tlakbal bawk avangin kawng siam chawp a nih hnuah Guwahati a siam turin thawn a ni a. A that hun tur a la sawi theih hrih loh a ni.

Heng tuilian avanga chhiatna thlengte siamthat nan hian sum tam tak mamawh a ni dawn a, Minister Pu K. Sapdanga chuan SIPMIU in Phase III siamthat dan tur ruahmanna an siam a enpui bakah rang tak siamthat a nih theih nan theih tawp a chhuahpui tur thu vawiin hian a sawi a ni.

37 MLD Water Treatment Plant hi Aizawl Greater Water Supply Phase I & II nen tangkawpin Aizawl khawpui tui in tur mamawh belhna hi kum 2033 thleng a phuhruk thei tur a duan a ni a. Aizawl khawpui chhungkaw engemawzat mamawh lo phuhru ve thawh thin hian tui mamawh engemawzat hmalak dan tur te an sawiho a. Helai hmun atang hian tui in tur engemawzat lo pump thin a lo ni tawh a ni.

Home Minister hi Pu CC Lalchhuangkima, CEO, Aizawl Smart City Limited leh a thawhpuite, Pu Lalrothanga, Program Director, SIPMIU leh a l thawhpuiten an tawiawm a. City Centre sak a enfiah naah hian Commerce & Industries Joint Director leh official dangte bakah Dawrpui Local Council aiawh te, New Market Sumdawng Joint Association leh Lushai Engineers aiawh ten an lo dawngsawng a ni.