3173/2022-2023

Kolasib dated 4th January 2023: Vawiin khan Bairabi Games & Sports Association buatsaih, Infiamna Kutpui hawnna hun chu Bairabi Playground ah Pu K.Lalrinliana, Minister, Food, Civil Supplies & Consumer Affairs Department chuan khuallian niin a hawng a. Pu R.Lalchhuankima, President, Bairabi Games & Sports Association in hun kaihruaiin Pu R.Lalrinawma, Chairman, Bairabi Joint Village Council chu khual zahawm a ni.

Khuallian Pu K.Lalrinliana, Minister, FCS & CA chuan mizo infiamna chawi nun nan leh Bairabi thalaite infiamna kawng a tih hmasawnna tur a Infiamna Kutpui buatsaih a ni chu lawmawm a tih thu sawiin he Infiamna Kutpui tih hlawhtlinna tur a Sports Minister, Kolasib district Deputy Commissioner, NGO hrang hrang hmalakna chungah lawmthu a sawi a. Bairabi mipuite thawhhona chu fakawm a tih thu a sawi bawk a ni. Supply Minsiter chuan hriselna chu hmasawnna kawng pawimawh tak a nih angin taksa insawizawi leh infiamna hrang hrang uar turin kalkhawmte a chah a, Bairabi khaw chhung a Sawrkar hmalakna a khelmual hrang hrang siam te chu țangkai tak a hmang turin a chah. Pu K.Lalrinliana chuan Bairabi chu Mizoram luhka pawimawh tak, hripui len vanglai pawh a Mizoram mipui ei tur rel hmang a lakluhna hmunpui, ram pawn a mizo tangkhangte an lo thlen khawm lai pawh a Mizo tlawmngaihna nasa tak a lan chhuah tir țhin tu an nih avangin entawntlak a tih thu a sawi a. Bairabi khaw chhung a tui lakna thawmțhat hna te, ramri tihchangtlun hna te, Tlawng tui lian vang a harsatna awm țhin tih ziaawm nana hmalakna kal mek te tarlangin Minister chuan Sawrkar leh mipui indawrtawnna awlsam zawk a awm theih nan Bairabi chu SDO(Civil) țhuthmun a siam turin hmalakna a kal mek thu a sawi bawk a ni.

Pu R.Lalchhuanawma, Secretary chuan report pein Infiamna Kutpui chu January ni 12 thleng awh tur a nih thu leh infiamna chi hrang 18 buatsaih a nih tur thu a sawi a. Bairabi Infiamna Kutpui tih puitlin nana Bialtu MLA Pu K.Lalrinliana, Sports Minister Pu Robert Romawia Royte, Kolasib Deputy Commissioner Pu John LT Sanga leh NGO hrang hrangte hmalakpuina chungah lawmthu a sawi bawk a ni. Vawiin Bairabi Infiamna Kutpui hawnna hun ah hian Bairabi khawtlang leh NGO hrang hrang hruaitute an tel a, Kolasib district office țhenkhat hotuten Minister hi țawiawmin Bairabi khaw mipui țhahnem tak an tel bawk a ni.