No.417/2021-2022


Kolasib dated 5th May 2021: District Hospital, Kolasib-a Truenat khawl chu April ni 13, 2021 atang khan a chhiat avangin siamtirna hmunah thawn a ni a. Khawl siam that a nih hnuah inthawnletna kawngah harsatna a awm avangin Kolasib district-ah Truenat sample endik chu chawlh lailawk a ni a, RT-PCR sample erawh ZMC-a endik turin lak chhunzawm zel a ni thung a ni. Contact Tracing chak zawk a kalpui nan te leh khunghrante a hun taka endik an nih theih nan FCS&CA Minister Pu K.Lalrinliana, Kolasib Assembly Constituency bialtu MLA ni bawk chuan Health & Family Welfare Department Minister-ah thlenin khawl lo thlen  hma atana hman tur Truenat UNO a lo pe a ni.

Minister Pu K.Lalrinliana chuan hrileng dona kawnga pawimawh tak, a hnuchhuina te leh khunghran endik hna kalpuina khawl District Hospital Kolasib ami chhiat chungchangah leh siam that hnu pawha inthawnletna kawngah harsatna awm chu pawi a tih thu sawiin Health Minister hnenah heng harsatnate hi a sawipui thu a sawi a. Health Minister nen ruahmanna siamin Kolasib Truenat khawl siamthat a nih hma atan a hman tur Truenat UNO chu Health department atangin lak a nih thu a sawi a ni. Pu K.Lalrinliana’n Truenat UNO khawl chu Dr.Doris Lalnunmawi Sailo, DMS hnenah a hlan a, tluang taka hman a nih chuan Truenat sample 10 tal nikhat a endik hman tura beisei a nih thu a sawi.

Kolasib District Hospital-ah hian thawktu dang engemaw zat bakah Doctor 4-te khunghran mek an ni a, 1 hi Covid Care Centre-a enkawl mek a ni bawk a ni. Vawiin hian Minister Pu K.Lalrinliana hian Truenat UNO khawl bakah Sanitizer thahnem tak, PPE suit, kutkawr leh mask-te a pe tel bawk a ni.


Attachment

  • Loading attachment...