No.715/2021-2022

Kolasib dated 28th May 2021: Vawiin chawhnu khan Pu K.Lalrinliana, Minister of State for Food, Civil Supplies and Consumer Affairs Department, Kolasib Assembly Constituency bialtu MLA ni bawk chuan Covid-19 vei leh vei loh endikna khawl MLA-LADS hmang a lei, Truelab Quattro chu Dr. Doris Lalnunmawii Sailo, DMS, District Hospital, Kolasib hnenah a hlan.

Minister Pu K.Lalrinliana chuan Covid-19 hrileng dona atan a rim tak a thawktu DC Kolasib Office-a thawktute, District Hospital-a thawktute, Sawrkar department hrang hrang, VLTF leh NGO-te chungah lawmthu sawiin “Mipui nawlpui zingah hrileng lak a fimkhur nachang hria an pung chho mek zel a, hei hi hrileng dona atana thil pawimawh tak a ni a, kan zavai a kan thawhho zel a ngai a ni,” a ti. Minister chuan hri dona kawnga harsatna awm te chu inthlahrung lova a hnen a thleng zung zung thin turin District Hospital-a thawktute chu a chah a, khawtlang leh sawrkar thawhhona hnuaiah hri kai an tlem hret hret ni a lang chu lawmawm a tih thu a sawi. Truelab Quattro khawl chu Covid-19 hri kai leh kai loh endikna atan leh hri dangte endikna atan a tangkai tak a Kolasib mipui ten an hman ngei a duhsak thu a sawi bawk a ni.

Truelab Quattro khawl inhlanna hun kaihruaitu Dr.H.Lalthlangliana, Deputy Commissioner chuan khawl indaihlohna avanga ni 10 aia rei inkhunghrang a hun hmang, test result ngaichang mi thahnem tak an awm thin thu a tarlang a. Minister Pu K.Lalrinliana hmalakna a District Hospital, Kolasiba Truelab Quattro dah belh a ni ta chu lawmawm a tih thu sawiin Kolasib District mipuiten Covid-19 test result chhuak har avanga harsatna an tawh thin chu sutkian a nih ngei a beisei thu a sawi bawk a ni.

Truelab Quattro khawl hian vawi khatah sample pali a endik thei a, a endik nan hian darker khat vel a awh thin a ni. Truelab Quattro khawl pahnih hi chatlak awm lova hna an thawh chuan ni khatah sample 80 atanga 100 endik hman beisei a nih thu Dr.Lalhlimpuia, CMO chuan a sawi. Khawl thar bak ah hian Test kit 400 District Hospital-ah hian pek nghal a ni bawk a ni.

Khawl inhlanna hun hi District Hospital a thawktute leh NGO hruaitu thenkhat ten an telpui a, Dr.Doris Lalnunmawii Sailo, DMS chuan lawmthu sawina hun a hmang bawk a ni.