2235/2022-2023
Kolasib dated 7th October 2022: Vawiin chawhnu khan SIRD Extension Training Centre, Vengthar Kolasibah Mizoram Rural Bank Rural Self Employment Training Institute hawnna hun leh hemi hnuai a Piggery Training Programme hawnna hun neih a ni a. FCS & CA Minister Pu K.Lalrinliana chuan khuallian niin a hmanpui a, Pu C.Laldampuia, Director, MRB RSETI-in hun a kaihruai a ni.

Minister Pu K.Lalrinliana chuan Mizoram a Rural Self Employment Training Institute pahnihna ni tur a MRB RSETI hawn a ni ta chu lawmawm a tih thu sawiin thiamthil nei tur a mumal tak a inzirtirna kalpui bak ah eizawnna bultan nana Bank puihna awm tur chu lawmawm a tih thu a sawi bawk a ni.

Pu K.Lalrinliana chuan thiamthil neihna chuan mahni inrintawkna a siam thin thu leh chu chu eizawnna bultanna kawng a thil pawimawh tak a nih thu sawiin Mizoramah kan mamawh ang sa tharchhuah a nih theih nan, a tihral kawnga harsatna awm lo tur a ngaih, MRB RSETI hmalakna hnuai a Piggery Training Programme buatsaih a ni chu lawmawm a tih thu a sawi.

Pu John LT Sanga, Deputy Commissioner pawhin khawpui pawn lam a thalai rualte hnen a eizawnna atan a hmatlak thiamthil neih tir chu a ram hmasawn nan a pawimawh tak zet thu leh ram tih hausak nana hmanraw tangkai tak a nih thu a sawi bawk a ni.

Pu Liankunga, Chief Manager, Assets Management Hub chuan RSETI kaltlanga training chhuakte chu Bank in loan pek chungchangah theihtawpa duhsak an nih tur thu tarlangin innghahna tlak thiamthil zirchhuahna hmun a nih ngei theihna turin duhsakna a hlan a. Pi Ramchhanmawii, Faculty, MRB RSETI chuan kalkhawmte lawmna thu a sawi bawk a ni.

Ni 7, September 2019 khan State Level Bankers Committee chuan Kolasib district-ah RSETI din turin a lo rel tawh a. Ni 8, April 2022 khan Kolasib District Level Advisory Committee thutkhawmna hmasa ber neih niin hna thawk tan thei tura a tul angte bawhzui zel a ni a. Ni 31 May, 2022 ah thawktu turte lak fel niin ni 22, June 2022 khan thiamthil, eizawnna tlak inzirtirna kawngah Training pek tan a ni. Vawiin a Piggery Training Programme nen hian training tum 5 butasaih a ni tawh.