Nimin khan UD&PA hnuaia mission kalpui Deendayal Antyodaya Yojana – National Urban Livelihoods Mission (DAY-NULM) hnuaia “Scheme of Shelter for Urban Homeless”,tawm hulna tur neilote tana riahna tur sak “Dharamsala” hawnna hun hman a ni a, he hunah hian Agriculture Minister Pu K.S. Thanga chu Khuallian niin, UD&PA Director Pu Joseph H.Lalramsanga chu chairman a ni a, Health & Family Welfare Commissioner & Secretary Pu Lalrinliana Fanai, IAS, Hospital & Medical Education Director Dr T. Lalhmangaihi, Mizoram Institute of Medical Education & Research (MIMER) Director Dr L. Fimate te bakah khawtlang hruaituten he hun hi an tel pui bawk.

Minister Pu K.S. Thanga chuan UD&PA hmalakna chu fakawm a tih thu sawiin, damdawiin bulah damlo leh damlo awmpuitute tan chawlhbuk awm tur chu a thlamuanthlak dawn hle a ni, a ti a, khawtlang pawh an zangkhai phah ngei a beisei thu a sawi. Pu K.S. Thanga chuan Mizoram sawrkar in State Referral Hospital, Falkawn tih changtlun nan leh MIMER kan hman tan thuai theih nan hma nasa taka lak mek a nih thu a tarlang bawk. He hunah hian Dr. T. Lalhmangaihi hnen atangin thusawi ngaihthlak a ni a, Pi Malsawmdawngliani SMM, DAY-NLUM hnen atangin technical report ngaihthlak a ni bawk.

DAY-NLUM hnuaiah hian kawtthler a riak mai mai, in leh lo neilote tan riahna in siamsakna tur Scheme of Shelter for Urban Homeless a awm a, he scheme hmang hian Damdawiin huamchhungah damlo awmpuitute zanriahna tur In sak theihna a awm a, chumi hmang chuan Health & Family Welfare department ten chawlhbuk sakna tur ram hi an pe a ni. State Cancer Hospital, Zemabawk leh State Referral Hospital, Falkawn huamchhung bakah hian Mamit District Hospital ah pawh chawlhbuk hi sak tura rauhmanna tih fel tawh a ni bawk.

Dharamsala Falkawn hi nuai 50 senga sak a ni a, March 2017 ah sak tan niin March 2018 khan sak zawh a ni. A zau zawng hi 322sqft a ni a, Basement leh Ground floor awmin mipa leh hmeichhe riahna hi a hrana siam a ni. Basement ah hian Male dormitory, Family dormitory, Counseling room, Kitchen, Dinningroom te awmin, Ground floor ah hian Female dormitory, Care taker room leh store room te a awm bawk a, a vain khum 30 leng tura duana ni.