Vawiin khan Minister of State leh Mizoram Football Association President ni bawk Pu Lal Thanzara chuan Aizawl District Football Association tournament final Sipai Lammual-a khelh chu telpuiin, tournament kharna hun a hmang a ni.
Pu Lal Thanzara chuan District Football Association-te chu langsar silova Mizoram Football tinungtu pawimawh tak an nih thu sawiin, vengtin khawtina football-a tui tur thalaite enkawltu pawimawh chu district association-te an ni, a ti a. Sorkar hmalakna avangin khelmual tha tak tak siamte hmang tangkaia, tournament buatsaih reng a ni thin chu lawmawm tiin, player-ten an hmasawnpui zel theih nan taimakna, huaisenna leh tumruhna nen ke an pen a duhsak thu a sawi bawk.
Minister chuan Mizo nula pahnih National U-17 trail a tel turin nimina an kal thu te, Coca Cola Cup U-14 Tournament chu District hrang hranga khelh turin buatsaih mek a nih thu te leh, 2017 U-17 World Cup India in a thlen tura inbuatsaihnaah Mizo player tam zawkin India aiawha khel turin an chhuah a beisei thu a sawi bawk.
Vawiin hunah hian MFA leh ADFA hruaitute an tel thahnem hle a. Inkhel final-ah hian Ramhlun ‘N’ Football Club leh Upper Republic Football Club-te an intum a ni.
