Vawiin September 21,2019 Inrinni hian New Delhi-a Vighyan Bhawan-ah Central Advisory Board of Education CABE meeting neih a ni a. Mizoram sorkar  aiawhin School Education Minister Pu Lalchhandama Ralte a tel.

    CABE meeting-ah hian School Education Minister chuan thusawiin National Education Policy 2019 ah India  hnampain a lo mitthla ang thil pawimawh leh a tum zawng zawngte chu  India ram zirna kalphung laipui a ni tur a ni a ti a. India Danpui Eight Schedule a tawng 22 pawm tawh bakah hmun hrang hrang, a bikin India hmarchhakah tawng hlawm lian tak tak a awm a. Rampumah tawng pakhat hman a, chumiin hnam tlem zawkte tawng luahlantir zawnga hmalak chu engti kawng pawha pumpelh a tul a ni a ti a. Zirna in hrang hrangte leh an chet vel dan tur duansa han thlirin NEP 2019 duan chhinah ram pum tan tehna thuhmun lek a la ni fo a, ram chhunga zirna in tam tak chu draft NEP rawtna piah lamah an awm thei dawn a ni a ti. NEP a tehkhawng leh pawm theih chin atana rawtna te chu ram chhunga cheng zawng zawngte huap kim thei tura en that leh tul a tih thu te a sawi bawk.
   
Minister chuan Mizorama elementary school a Hindi zirna thar thawh leh nan Hindi teachers 1305 te hlawh pe turin sorkar laipui tanpuina a ngen a, heng mite hlawh pek an nih chuan Mizoramah Hindi zirna kan thar thawh leh thei dawn a ni a ti.
    
Pu Lalchhandama Ralte chuan Teachers Quarters chungchang pawh CABE meeting-ah hian a sawi a.  Thingtlang kilkhawra Elementary leh Secondary school ah te zirtirtute chenna tur quarters awm tha lo chu hmanhmawh taka ngaihtuah ngai a ni a ti a. MHRD in RMSA scheme kaltlanga teachers quarters sakna tur a pek avangin quarters 282 sak zawh tawh a ni chu lawmthu a sawi a. Hemi bakah NEDP hnuaiah quarters 30 sak a ni  tih a sawi a, zirtirtute an thawhna hmunah chenna in luah tur neih loh avanga an awm tha thei lo leh aikal lak te chu zirnain a tuar hle tih sawiin Mizoram chhunga thingtlang khua sorkar school awmnaah sikul pakhat zel tan a tlem berah teachers quarters unit hnih tal pe turin sorkar laipui chu a ngen bawk.
    
CABE meeting hi Union MHRD Minister Ramesh Pokhriyal a'n a hova, India rama state hrang hrang Education Minister 19 te an tel thei a. Pu Lalchhandama Ralte hi  Pu Lalhmachhuana Joint Director School Education-in a tawiawm a ni

Attachment

  • Loading attachment...