1050/2026-2027

Aizawl, the 17th of June, 2026: Vawiin chawhnu dar 1:00 khan Minister Pu Lalnghinglova Hmar, Sports & Youth Services Department etc. changtu, Aizawl West II bialtu MLA ni bawk chuan a bial chhunga sorkar primary school a zirlaite hnenah school uniform pheikhawk a sem a. Govt. Primary School, Dinthar leh Govt. Gairigaon Primary School te hnenah pheikhawk semna hun hi Dinthar YMA Hall-ah hman a ni.

Minister Pu Lalnghinglova Hmar chuan, “Aizawl West-II a veng hrang hranga sorkar primary school-ah school uniform pheikhawk hi kan sem dawn a, kan bial chhunga sorkar primary school zirlai zawng zawngten an dawng vek ang. Sorkar school a lutte kan puihna tura sem kan ni a, kumtharah engtinnge kan inpuih leh theih ang tih pawh kan ngaihtuah leh dawn,” a ti.

Mizoram a zirtirtu tha berte awmna chu sorkar school a ni a, sorkar school-ah chuan trained teacher vek an awm a. Nimahsela a pawl hniam lamah sorkar school-a in kaltir hrehna a awm thin a, Aizawlah sorkar school te hi luh nan a tha tawk a ni tih hi Aizawl West II atang hriattir kan duh, Minister chuan a ti a. A bial chhungah zirna tihhmasawn a tihlen zel a tum thu leh hma an sawn ve zel ni a a hriat thu sawiin Pu Lalnghinglova Hmar chuuan Dinthar Vengah sawrkar sikul hmunhma in a zawh loh avangin zirlai pawh inlak theih loh chin a awm a, sikul tihchangtlun lamah pawh hmalak dan a ngaihtuah tur thu a sawi.

LESDE Minister ni bawk Pu Lalnghinglova Hmar chuan zirlai nu leh pate, nitina inhlawha eizawngte chu Mizoram Building & Other Construction Workers Welfare Board (MBOCWWB) a inziaklut turin a sawm a. MBOCWWB member fate zirnaah hamthatna hrang hrang an ban phakah a awm thu a sawi. LESDE Office-ah thlakhata cheng 10 chawia inziahluh theih reng a nih thu sawiin, an faten zirna sang zawk an kai thleng pawha hamthatna dawn tur a awm thu te, dam lohna thilahte leh thildangah pawh hamthatna dawn tur a awm tih a sawi a ni. MBOCWWB hnuaiah Rahbi Chhertu leh Eizawnna Kailawn kaltlangin thiamna hrang hrang zir theih a nih bakah bul tanna tur thlengin a inngaihtuahpui theih thu a sawi tel nghal a ni.

Bialtu MLA in school uniform pheikhawk a semnaah hian a thawhkhatnaah Dinthar Venga sorkar primary school pahnihte atangin zirlai 214 in pheikhawk an dawng a. Tunkar leh karleh tirlamah sem chhunzawm a ni dawn a, bial chhung primary school zirlai 673 hnenah pheikhawk hi pek turin an ruahman.

Vawiin hun hmanaah hian Pi Carolyn Rinthanpuii, SDEO, Aizawl West leh Dinthar Local Council te bakah zirlai naupangte, zirtirtute leh nu leh pate an tel a ni.