2993/2023-2024

Aizawl, 11.12.2023: Vawiin chawhma dar 9:30 AM khan Minister of State for Sports & Youth Services, LESDE, etc. Pu Lalnghinglova Hmar chuan a pisa a luah lut. Minister pisa thar hi MINECO second floor (Room no. 207 & 208) ah a awm a ni.

Minister chuan Minister dinhmun a chang thei chu lawmawm tiin, election a thlan tlin a nihna chu bultanna chauh a nih thu leh hmabak la awm turah thawhpuite leh mipui tawiawmna a pawimawh thu a sawi a. A portfolio chan chungchangah thalaite kaihhnawih chi – infiamna lam te, hna zawnna leh eizawnna kaihhnawih thiamna inzirtirna te bakah thalaite run nasa em em tu zu leh ruihhlo do chungchang pek a nih thu a sawi a. Thalaite hmakhua ngaihtuah a, an tan theihtawp chhuah tlan a nih tur thu a sawi. Minister chuan tih dan phung pangngai in hna chu thawh theih ve thin tho mahse, ram siamthat hna thawk a danglamna tak taka thlen tur chuan tih tak zet a hma lak a tul thu sawiin, tawngtaipui thin turin kalkhawmte a sawm a ni.

Vawiina Minister in pisa thar a luah luhna hun hi a chhungkhat laina hnai te, South Tuipui bialtu MLA Pu Jeje Lalpekhlua leh Minister bial Aizawl West II chhunga political party aiawh te, media lam atangin leh sawm bik thenkhat an tel a ni. Minister Pu Lalnghinglova Hmar hian Sport & Youth Services Department, Labour, Employment Skill Development & Entrepreneurship Department (LESDE) leh Excise & Narcotics Department a chang a ni.