3064/2024-2025
New Delhi, the 19th of November, 2024: New Delhi-a cham mek Pu Lalnghinglova Hmar, Minister of State, Sports & Youth Services leh Labour, Employment, Skill Development & Entrepreneurship (LESDE) Department chuan nimin khan a department kaihhnawih Sawrkar laipui Ministry-a Secretary te a kawm a, Mizoram mamawh leh hmachhawp hrang hrangte a sawipui.

LESDE Minister Pu Lalnghinglova Hmar chuan nimin chawhnu dar 2:00 ah Pi Sumita Dawra, Secretary to Government of India, Ministry of Labour and Employment (MoLE) chu New Delhi-a a office-ah a hmu a, MoLE hnuaia scheme hrang hrangte chu Mizoram tan tangkai leh hlawk zawka kalpui dan tur an sawidun. MoLE Secretary nena an sawidun zingah hian Sawrkar laipuiin hna tam zawk siam tura scheme a kalpui Employment-linked Incentive (ELI) scheme bakah Employees’ State Insurance (ESI) scheme leh Employees’ Provident Fund (EPF) scheme te a tel a ni.

Sports Minister ni bawk Pu Lalnghinglova Hmar hian nimin tlai dar 5:30 khan Pi Sujata Chaturvedi, Secretary to Govt. of India, Department of Sports, Ministry of Youth Affairs and Sports (MYAS) pawh a office-ah hmuin, sports-a Mizoram sawrkar hmachhawp leh hmalak mekte a sawipui. Mizoram chu State lian lo leh mihring tlemna, state sports budget pawh tam lo tak ni mahse mi nawlpuiin infiamna an ngaina a, sports chu chhungkaw engemawzat ta’n eizawnna a tling a ni a ti a. Sports Secretary chuan MYAS piahlamah Ministry danga sports project lian tham siam turin Minister chu a chah a, a tulna zawnah theihtawp a chhuahpui tur thu a lo hrilh a ni.

LESDE Minister hian nimin vek khan Ministry of Skill Development & Entrepreneurship (MSDE) Secretary Pu Atul Kumar Tiwari pawh a office-ah kawmin, Sawrkar laipuiin ITI tihchangtlun a kalpui mek chungchanga Mizoram dinhmun an sawidun. MSDE hnuaia scheme pawimawh tak Pradhan Mantri Kaushal Vikash Yojana (PMKVY) 4.0 hnuaia Mizoram thalai 10,220 thleng huam thei skill development training kalpui mek pawh an thlirho nghal bawk. PMKVY hnuaiah Mizoram tan ‘Special project’ siamin, Mizo thalaite tuina leh thiamzawng mila skill development training kalpui turin hma lak nise an ti a ni.

Meeting-ah hian Pu John Tanpuia, Joint Secretary, S&YS Dept. & Director, LESDE Department leh Pu H. Lalramenga, PS te’n Minister hi an tawiawm a ni.