3271/2022-2023
Aizawl, 16th January, 2023 : DIPR Minister Pu Lalruatkima chuan vawiin tlai khan Melthumah V. Lalbiakzama (BZA) Automobile TATA Servicing Centre chu ribbon chep chatin a hawng.

Hawnna inkhawm buatsaihah khuallian Pu Lalruatkima chuan thu sawiin, lirthei neitute tana tangkai leh chhenfakawm tur V. Lalbiakzama (BZA) Automobile TATA Servicing Centre hawnna hun an han hmang thei chu a lawmawm takzet a ni a ti a. Lirthei nei chuan Servicing Centre pawimawhzia chu sawi tam ngailoin kan hre theuh a, lirthei kan lei dawn pawhin kan ngaihtuah hmasak ber thin chu a servicing centre a awm em? an service a tha em? tih a ni thin a, lirthei company eng anga tha pawh nise servicing centre tha bul hnaia a awm loh chuan a buaithlak em em thin a, lirthei company tlachhia kan tih tamtak te pawh hi an tlakchhiatna bul chu an servicing a that tawk loh vang te a ni fo a ni, ti a. Servicing Centre thar chu an customer te tan malsawmna leh lungawina thlen thin tu ni ngei turin duhsakna a hlan a ni.

TATA Motors hi kum 1945 a din a ni a, anni hian motor ke pali nei chinah chuan a te ber atanga lian ber bakah indo motor thlengin an siam a ni. A tirah chuan Rail engine siam chhuaktu an ni a, commercial vehicle an siamchhuah hmasak ber chu kum 1954 khan Daimeir-Benz AG nen a tangkawp khan a ni.

V. Lalbiakzama (BZA) Automobile TATA Servicing Centre hawnna inkhawmah hian Deeptendu Deb ,Senior Manager, Customer Care TATA Motors pawhin thu a sawi a, Pu Vanlalruata'n lawmthu sawiin hun a khar a ni.