Mizoram State Legal Services Authority (MSLSA) leh Govt Mizoram Law College tangkawp buatsaih ‘National Seminar on Victims of Trafficking & Commercial Sexual Exploitation’ chu vawiin khan Law & Judicial Minister Pu Lalsawta’n Legal Chamber, Govt. Mizoram Law College, Aizawl-ah a hawng.
Seminar hawnna inkhawm Mizoram Law College Asst. Prof. Dr.Y.P.Singh kaihhruaiah Khuallian Pu Lalsawta chuan he khawvel harsa tawh tak, bungrua chauh ni lo, mihring thlenga ‘Engzat man nge?’ tih inzawhnaah hian National Legal Services Authroity bultumin Seminar pawimawh tak neih theih a nih chu a lawmawm hle a ni, a ti a. Mihringin tawhsual a tawh loh nan te, a lo tawh palh pawha a tuam damna awm theite leh misual chu hrem ngei a nihna tur kawng inkawhhmuhna chungchang zir a; khawvel thang zelah sualna pawh kawng hrang hrangin a pung ve zel a, chuvangin he Seminar chhimtu zirlai, officials leh mithiam kalkhawmte chuan mimal, khawtlang leh ram tan tangkai thei ang bera he hun an hman theih nan duhsakna a hlan a. Thla hmasa September 2017 chhung khan pawngsual tawk, sumdawn nana bum/hralh leh naupang khuaikhem tuar mi 23 hnenah sorkar chuan a vaiin cheng nuai 33 chuang zangnadawmna a pe a; chung zinga tam zawk chu naupang niin, an tawhsual tuarzo lova boral zawngnadawmna la tura rawn lang thei lo engmawzat an awm bawk, a ti. Khawvel changkan zelna hian thil tha rualin thil tha lo tam tak pawh a hrin zel a, chuvangin mipuite chu dan chungchang inzir a, eng thil pawh lo thleng se hmalak dan tur an hriat a tul takzet tawh a, chumi atan chuan vawiin ang Seminar nei hi a hlawk hle a beisei thu a sawi. Khuallian Lal Minister hian Govt Mizoram law College 22nd Annual magazine ‘JURISPRUDENTIA’ tih a tlangzarh nghal a ni.
Keynote Address sawitu MSLSA Member Secretary Pu Joel Joseph Denga, MJS chuan Legal Services Authority din chhan ber chu tanpuitu neilote tanpui a ni a; mi harsa zawk leh a kalhmang hrelote chu an dinhmun avanga thliarhranna awm lova rorelna dik an chunga a awm theih nana kawng tinrenga tanpui hi a ni, a ti a. Tawhsual tawkte, a bik takin pawngsual, mihring hmanga sumdawnna leh naupang khuaikhem chungchangah Mizoram sorkar hmalakna a fakawm hle a; pawikhawihtute hremna leh a tuarte zangnadawmna pekna lamah sorkar chuan a tih tur dik tak leh rang taka a tih thin avangin lawmthu a sawi a. Kumin chhungah hetianga tawhsual tawk mi 40 chuang hnenah Mizoram sorkar chuan zangnadawmna a pe tawh tih a tarlang bawk.
Govt Mizoram Law College Principal Dr.Rualkhuma Colney chuan Seminar chhim tura lo kal zawng zawngte lawmna thu a sawi a. Mizoram Law College chu kum 1983-a din niin Bar Council of India leh Mizoram University hnuaiah in-affiliate a nih bakah University Grants Commission hnuaia pawh pawm (recognised) thlap a nih thu a tarlang a. Vawiina Khuallian Law Minister Pu Lalsawta ngei pawh he College atanga zirchhuak a nih thu leh Mizoram sorkar hnuaia officer tam takte pawh he College atanga zirchhuak an tam hle a ni, a ti bawk.
Ni 2 awh tur ‘National Seminar on Victims of Trafficking & Commercial Sexual Exploitation’ chhung hian heng a hnuaia Judge leh Resource Person ten an hmanpui dawn a ni :
Judges :
1. Hon’ble Mr. Justice Ujjal Bhuyan, Judge, Gauhati High Court & Executive Chairman, Mizoram SLSA
2. Hon’ble Mr. Justice Michael Zothankhuma, Judge, Gauhati High Court
3. Hon’ble Mr. Justice Nelson Sailo, Judge, Gauhati High Court
Resource Persons :
1. Mr.Thangzakhup Tombing, Asst. Professor, National Law University and Judicial Academy, Assam
2. Mr. Himanshu Ranjan Nath, Asst. Professor, National law University and Judicial Academy, Assam
3. Mr. Stephen lalrinawma, MPS, Addl. SP CID, Crime, Mizoram
4. Ms. Sylvie Z. Ralte, MJS, Senior Civil Judge, Mizoram
5. Dr.Richard V.L.Ramhluna, Epidemiologist, Mizoram State AIDS Control Society
6. Prof. Dr. Vijay Pratap Tiwari, Associate Professor, Maharashtra National Law University, Nagpur
