Minister of Finance, Planning, etc. Pu Lalsawta chuan nimin (16.05.2017) khan Sorkar laipuia Finance Minister Pu Arun Jaitley leh NITI Aayog Vice Chairman Dr. Arvind Panagariya-te chu an office ve ve ah Sorkar laipui hmalakna kara Mizoram mamawh leh thu pawimawhte sawipuiin a kawm. 

Minister Pu Lalsawta hian Union Finance Minister Pu Arun Jaitley a kawm naah 10% Gross Budgetary Support for North Eastern States (GBS) leh Non-Lapsable Central Pool of Resources (NLCPR) kalpui zel tura rawtna a thlen a. Union Finance Minister chuan 10% GBS leh NLCPR tihtawp tum anga sawi awm chu thutlukna engmah a awmloh thu sawiin, kalpui zel nise tha a tih thu a lo hrilh a. Minister Pu Lalsawta chuan NEC leh NLCPR atana sum tam zawk ruahman a tul thu rawtna thlenin, chung bakah chuan Ministry of Human Resource Development scheme hnuaia Hindi Teacher Mizoram a rawih chhunzawm zel an tul thu leh, rawih chhunzawm an nih theihnan a ruahmanna siam turin Union Finance Minister chu a ngen nghal a. Union Minister Pu Arun Jaitley chuan a remchan dan anga hmalak a tum thu  lo hrilh a ni. 

NITI Aayog Vice Chairman Dr. Arvind Panagariya chuan a pisaah Minister Pu Lalsawta chu Sustainable Development Goals (SDG) kalpui mek dan leh India hmarchhak state-te tana hamthatna kalpui mek siam danglam tumna awm anga Ministry thenkhatin an sawi chungchang a sawipui a. Mizoram Finance Minister chuan Sustainable Development Goals kalpui mekah tehfung (indicators) mumal tak NITI Aayog in a ruahman loh chuan state ten rualkhai taka an kalpui a harsat dan tur hrilhin, SDG target tin atana tehfung inang hmang thei tura ruahmannna siam turin rawtna a thlen. India hmarchhak state-te tana hamthatna kalpui mek 10% Gross Budgetary Support leh NLCPR kalpui mek tih tawp tumna awm anga sawi chu thalo a tih thu leh, tha zawk leh mumal zawka kalpui zel ni se a duh thu a thlen a. Dr. Arvind Panagariya chuan tihtawp tum a nih loh thu leh kalpui zel tur nia a hriat thu lo hrilhin, Mizoram Finance Minister rawtna hrang hrangte lo zirchianga tan lak pui a tum thu a sawi bawk.