4744/2025-2026

Dated Aizawl, the 9th March 2026 : Tukin zing dar 6 khan Central YMA leh Art & Culture Department tangkawp buatsaih Chapchar Kut puala a huhova tlan ‘Chapchar Kut Run’ neih a ni a. Aizawl khawpui chhung hmun hnih - Sikulpuikawn leh Chanmari atanga tlan tanin, Lammual panin a huhova tlan a ni a. Lammual-ah zing dar 7-ah intawhkhawmna hun neih niin, Minister Pu Lalthansanga chuan khuallian niin a hmanpui a, Pu TC Lalkhuma, Joint Secretary, Art & Culture Department chuan a kaihruai a ni.

Minister Pu Lalthansanga chuan Chapchar Kut Run-a kalkhawmte chu chibai bukin, Chapchar Kut chu Mizo pi leh pute hun atanga hun pawimawh tak, zo nun ze mawi chhawmnunna leh inpumkhatna atana an lo hman thin a nih thu a sawi a. Mizo pi leh pute’n tlawmngaihna, inunauna leh rethei leh chhumchhia zawkte dawmkanna nun an lo neih thin chu thangtharte’n kan thiamna leh finna nena kan chawikan deuh deuh a tul thu a sawi a.

Minister chuan kumin Chapchar Kut lo awm turah hian hriselna chawi lar a pawimawh thu a sawi a. Taksa hrisel chuan rilru hrisel a siam a, chu rilru hrisel chu kumin Chapchar Kut thupui ‘Zo nun ze mawi – inremna’ hi aia upa zahna leh inpumkhatnate nen pawh a in rem hle a ni, a ti a. Tukina Chapchar Kut puala tlanhona (Chapchar Kut Run) neih chu a hlawkthlakin, Chapchar Kut tihlutu a nih thu a sawi a. Kalkhawmte chu Mizo hnam zia ropui tak chawisang zel turin a chah a ni.

Tukina Chapchar Kut Run-ah hian Aizawl City Branch YMA tin atangin member engemaw zat an thawk chhuak a. Pu M.S. Ralte, Fin. Secretary, CYMA chuan Sikulpuikawn atanga tlante a vailiam a, Pu SF David Ngursangzuala, Asst. Gen. Secretary, CYMA chuan Chanmari atanga tlante a vailiam bawk a. Lammuala intawhkhawmna hun neihah Pu F. Lalthanmawia, Joint Director, Art & Culture Department chuan lawmthu sawiin hun a khar a ni.