1463/2026-2027

Dated Aizawl, the 21st July 2026: Vawiin khan Lammual, Aizawl-ah Viksit Bharat Aizawl District Sports Festival 2026, July-21 aṭanga July-30 chhunga neih tur hawnna inkhawm hman a ni a, Minister Pu Lalthansanga chuan khuallian niin a hmanpui.

Khuallian chuan thu sawiin, Aizawl District Sports Committee (ADSC)-in Aizawl chhunga infiammite chawikanna tur hun ṭha - Sport festival a buatsaih chu lawmawm a tih thu a sawi a, infiammite ngaihhlut nachang hriaa hetiang sport festival buatsaih a nih theihna tura hma latu ADSC hruaitute chungah lawmthu a sawi bawk a ni.

Pu Lalthansanga chuan kum 2047-ah India chu ram changkang leh intodelh nih tumin hma a la mek zel a, hmasawna chu hmalakna pakhat chauhin a thlentir thei lova, hmalakna hrang hrang rahchhuah a nih thu sawiin, chung zingah chuan infiamna (sports) pawhin hmun pawimawh tak a luah thu a sawi a, infiamna chuan ram hmasawnna atana thil pawimawh tak tak- inlungrualna te, hriselna te, mahni invawnna te, chona leh inelna thianghlim te chu mimal leh khawtlang nunah seng luh an nihna tura hmanrua pawimawh tak a nih thu a sawi a ni.

Minister chuan Mizoram sawrkarin Olympic 2036 hmathlir neiin, a bulṭhut aṭangin infiamna a kalpui tih a sawi a. Viksit Bharat Aizawl District Sports Festival chu hemi kawnga hmalakna hmasa atana buatsaih a nih thu a sawi bawk. Mizo infiammite chu India ram dengchhuak thei tur thiamna leh theihna an neih thu sawiin, Olympic 2036-a Mizote ti hmingṭhatu ni thei tura hmalam pan zel turin kalkhawmte chu a fuih bawk a ni.

Inkhawm hi Aizawl Deputy Commissioner & ADSC chairman ni bawk Er. Lalhriatpuia chuan kaihruaiin, ADSC Member Secretary Pu Lalngilneia Colney hnen aṭangin report ngaihthlak a ni a, ADSC Sr. Vice Chairman Pu Ngurhmingliana chuan lawmthu sawiin inkhawm hi a khar a ni.

Viksit Bharat Aizawl District Sports Festival, 2026-hi Aizawl chhung hmung hrang hrangah neih tur niin, Discipline hrang hrang inelna turte chu:

1. Chess

2. Weightlifting

3. Teakwondo

4. Football

5. Wrestling

6. Judo

7. Wushu

8. Rifle

9. Table Tennis

10. Hockey

11. Karate

12. Athletics

13. Volley Ball

14. Badminton

15. Boxing

16. Tennis