892/2025-2026

Dated: Mamit the 23rd of June,2025: Vawiin khan Chhim Veng YMA Hall, Mamit-ah Pu Lalthansanga, Soil & Water Conservation Minister chuan Mizoram Kuhva Chingtu Pawl, Mamit District Hqrs Inkhawmpui chu Khual lian niin a hmanpui.

Minister chuan Inkhawmpui hmangtute hnenah chuan hun hlawkthlak tak hmang turin duhsakna a hlan a, MKCP Mamit Hqrs hruaitute hnenah lawmthu sawiin hruaitu entawntlak ni zel turin a chah.

Khual lian chuan kuhva chingtute hamthatna Sawrkar in a ngaih pawimawh thu sawiin Chief Minister ho a thutkhawmna neihnaah an harsatna te an ngaithlak sak thu a sawiin tunlai thiamna- scientific method leh khawl thiamna (technology) hmanga kan leilung mila kuhva enkawl that ngaihtuah a nih mek thu a sawi.

Pu Lalthansanga chuan Mamit a kuhva chingtute chu district dangte tana entawntlak khawp a thawk turin a chah a, chumi tur chuan tanrual leh intelthat a ngai a, hmasawnna tam tak a thlen theih thu a sawi. Chawhnu lama mi thiam atang a training chu ngun taka ngaithla a, hman a tul huna hmang ngei thei turin a chah bawk a ni.

Vawiin hunah hian Pu K Lalrochhara, DO Soil & Water Conservation, Mamit chu Khual Zahawm niin thusawina hun a hmang a, Pu C Laldina, President MKCP Gen Hqrs in hun a hmang bawk. Pu Vanlalruata, General Secretary, MKCP Gen Hqrs chuan report tawi pein in hmelhriattirna hun a hmang a,Pu Ngurthansanga Sailo, Secretary MKCP, Mamit Hqrs chuan hmalak tawh dan leh MKCP Mamit dinhmun report a pe bawk.

Chawhnu lamah training session Dr Vanlalhmuaka Ngente,KVK, Mamit district kaihhruaina hnuaiah neih a ni.