Vawiin chawhnu dar 1:00p.m. khan Lengpui ram, Chiahpui Lui leh Sairilzo Lui infinna hmuna LAD Park chu Minister Pu Pc Lalthanliana chuan a hawng a; hawnna inkhawm hi Pu C. Lalthankhuma, LAD Secretary chuan a kaihruai a ni.

Pu Pc Lalthanliana chuan “ LAD Park kan neih theihna tura tunhma atanga bul lo tum tu te leh vawiina a puitlin thlenga enkawltute chungah lawmthu ka sawi a; Hetiang hmunhma buatsaih hi sawrkarin kan department kutah a dah na in, tunhma atanga ramruak te lo ngaihtuah lawk anih loh avangin hmuntha avang tawh em em a, mipuite dawl zo tur khawp ruahman hi a harsa hle a ni”, a ti.

Minister chuan Park leh Picnic na hmun te hi thalaite chauh nilovin nu leh pa te pawhin naupang te nena hunthawl hmanna atan kan mamawh em em a; vawiina kan hawn tak pawh hi nawmchenna hmun atan nilovin chen nawmna hmun atan a hmangtu zawng zawng ten kan hmanthiam a pawimawh a ni, a ti a. Mizoram hmun hrang hranga mipuite intihhlimna atana hmun tha awmte chu LAD chuan a theih anga cheibawl zel a tum thu Minister chuan sawiin ‘tunah hian Kawmzawl, Lunglei hmuna LAD Park bakah hawn mai theih turin Hmuifang leh Muthi ah te buatsaih mek a ni a. Mizoram a khawtin te hian kan thalai te leh naupang ten thianghlim taka hun kan hmanna tur leh hawi khawthawnna tur tun atanga kan ruahman thiam a pawimawh a. Hmun tha taka hun tha tak hmanna tur kan neih ngah chuan kan khawtlang nun chhe mek ni a kan sawi pawh hi kan siam tha ngei ngei ang’, a ti bawk.

Vawiina hawn tak Lengpui khawthlen hma a LAD Park hi kum 2004 atanga ruahman tan a ni a; mimal ram Rs. 5.4 Lakhs a leikhawm anih bakah, Lengpui VC ten a chhehvel ramzau tak an pek belh a, a zau zawng hi bigha 30.67 a ni. Pawisa awmchawp ang zela chei a nih a avanga he Park buatsaih chhung hi rei anih thu LAD hotute chuan an sawi a, vawiina hawn a nih thleng hian Rs. 153.50 Lakhs sen a ni a; Kum 2008 atanga vantlang hman phal a nih atangin Rs. 5 Lakhs chuang a hman man an tel tawh a ni.

He Park chhungah hian Rest House te, Cabin te, Chowka te, Swimming Pool te, naupang intihhlimna hmanrua te leh picnic leh function neihna tura thil tulte dah a ni. Chawlh kar tluana hawn a ni a, Pathianni erawh chuan picnic phal a ni lo thung. A hman man hi nikhatah Rs. 2500 a ni a, Cabin-ah hian zan pawh a riah theih a ni.