Zo Ri-mawi International leh MJA Lunglei District tangkawpin naupang chanhai zawkte tanpui nan vawiin khan AOC Ramthar kawn, Lunglei-ah ‘Children In Need Mizoram Concert’ an huaihawt a, Horticulture Minister Pu PC Lalthanliana chu Khuallian chan changin Concert a hawng a ni.

Naupang chanhai zawk, zirna in pawh pan thei lo khawpa harsatna tawkte tanpui nana buatsaih ‘Children in Need Mizoram Concert’ hawnna inkhawm Zo Ri-Mawi International General Secretary Pu Lalrozama Ralte kaihhruaiah hian Khuallian Pu PC Lalthanliana chuan thu sawiin mi harsa zawkte tanpui tura hetiang Concert buatsaihtute leh a hlawhtlin nana mahni talent hmanga midangte tana tangkai tura rawn inpe artiste zawng zawngte chungah lawmthu a sawi a. Mihringin a inchhir loh ber chu midangte tanpui hi a ni a, kan nun tihlimtu leh tifamkimtu ber pawh midangte kan tanpuina leh chumi avanga malsawmna kan dawn let thin te hi a ni fo, a ti. Sorkar pawhin naupang ten enkawlna tha an dawn theihna tur chu ngaih pawimawh berte zingah neiin Social Welfare Department kaltlangin ruahmanna hrang hrang a siam a, heng scheme-te pawh chak taka hmalak mek a nih thu a tarlang. Ram leh hnam hmasawnna tur chuan naupangte awmze neia enkawl seilen hi kan tih makmawh a ni, a ti. Vawiina Concert hunchhunga vehbur khawnah Minister chuan hma hruaiin naupang chanhaite tanpui nan Rs. 5,000/- a thawh hmasa ber a ni.

Vawiin Concert hawnna inkhawmah hian Zo Ri-Mawi International chuan Khuallian Pu PC Lalthanliana chu ram leh hnam tana a hnathawh that leh Mizoram sorkarah chanvo pawimawh tak a chelh avangin lawmpuina Citation a hlan bawk a ni.