1093/2024-2025

Dated Serchhip, the 6^th July, 2024: Vawiin khan Chhingchhip Venghlun Branch MHIP te chuan MHIP Day vawi 50-na Golden Jubilee chu Chhingchhip Community Hall-ah an lawm a. Agriculture Minister Pu PC Vanlalruata, Tuikum bialtu MLA chu khuallian niin he hun hi a hmanpui a ni.

Minister chuan MHIP Rising Day vawi - 50 na lawmnaa a tel thei chu lawmawm a tih thu sawiin MHIP Member te leh kalkhawmte Golden Jubilee chibai a buk a, MHIP te chuan Mizoram hmasawnna leh kal zelna turah mawhphurhna pawimawh tak an chelh a ni, a ti. Pu PC Vanlalruata chuan chhungkuaah nu te an pawimawh a, fate enkawlna kawngah pate ai mahin an mawhphurhna a sang zawk a tih theih a, thalai ten sual kawng an zawh lohna turin nuten tan an lak nasat a ngai, a ti a. MHIP te chu khawtlang tana tangkai, society siamtha tura pawl pawimawh, hmeichhe chawikanna leh humhimna mai piahlamah khawtlang siamthatna kawnga thawhlawk an ni tih sawiin Pu PC Vanlalruata chuan MHIP Day hmangtu Chhingchhip Venghlun Branch MHIP te chu hlim taka an Day hmang turin duhsakna a hlan a ni.

Vawiin MHIP Day vawi 50-na lawmnaah hian Dr Andrew Lalramliana, Chhingchhip PHC chu khualzahawm a ni a. MHIP te lawmpuina chibai bukin, nu te hlutzia leh pawimawhzia hre thar leh tur te; chhungkua, khawtlang, Mizo hnam leh ram tan malsawmna ni zel turin a chah a ni.

Vawiin program hi Pi Hmingthanzauvi, President, Chhingchhip Venghlun Branch MHIP chuan a kaihruai a. Kum kalta chhunga an Branch chetvelna report ngaihthlak niin MHIP General Headquarters Aizawl atanga Golden Jubilee pual thuchah leh chibai bukna chhiar chhuah a ni a. Kum 2023 - 2024 chhunga an member boral mi pahnih sunna hun an hmang bawk.

Nilengin MHIP Day lawmna hun hman a ni a. Hnam lam leh zai te thlir leh ngaihthlak niin an member kum 80 chunglam te hnenah chawimawina an hlan bawk a ni.