Vawiin khan Rural Development Department chuan RD Directorate Conference Hall-ah Kumthar Inhlantharna Inkhawm an nei a, he hun hi RD Minister Pu R.Lalzirliana’n a hmanpui a ni.

Kumthar Inhlantharna Inkhawm RD Director Pi Lianhmingi Pachuau kaihhruaiah hian Minister Pu R.Lalzirliana chuan Department-a officer leh staff zawng zawngte kumthar atan duhsakna chibai bukin Mizoram mai ni lo rampum huap pawha an hnathawh that chu hriat a ni tiin a fak. Kumhlui kalta chhungin Directorate hnathawkte zingah boral awm miah lo chu Pathian malsawmna ropui tak a ni tiin Pu R.Lalzirliana chuan thawhpuite nen inngeih tak leh dawhthei taka hnathawh ho chuan leiah vanram kan chan tir thei a ni, a ti. RD Department chu mi hausa leh milian te tan ni lovin mi rethei leh harsa zawkte rawngbawl sak thin an nih angin zai dawh tak, biak nuam tak leh midangte hriatthiamna neia hnathawk zel turin a chah bawk a ni.

Rural Development Directorate Inhlantharna inkhawm-ah hian Pu Ramchhuana, Dy. Director (Accts) in hunserh a hmang a, zaihona nei zuiin tlaiah Minister hovin Directorate officer leh staff zawng zawng ten ruai an kilho a ni.