No.2958/2021-2022
Aizawl, the 11th November 2021 : Vawiin khan Pu R.Lalzirliana, Land Resources, Soil & Water Conservation enkawltu Minister chuan LR, S&WC Department Office, Tennis Court chhakah Rubber Development Board Office, Rubber Board of India in an rawn nghat chu a hawng.

Minister Pu R. Lalzirliana chuan Mizoram ngeia Rubber Board Office hawn a ni tawh chu Department tan mellung pawimawh tak leh rubber chingtute tan hlawkpui zawka rubber chin leh an hralhchhuah naah bung thar kaina nia a ngaih thu a sawi a. Khawvel sik leh sa inthlak danglam avangin tun hmaa thei leh tlai that theihlohna hmunah te, chung thei leh thlai te chu a tha thei tawh a, rubber pawh tun hmain phai zawl khaw lumah a tha thin a, mahse tunah chuan tlang ramah te pawh a tha tawh tiin rubber chin hi Mizoram economy siam tha thei nia a hriat thusawiin Department in rubber chingtute puih nan theihtawp a chhuah mek tih a sawi.

Minister chuan hun hmasa lamah Department chu zuihral mai tur anga sawi a ni fo thin a, mahse tunah chuan hming thar nen Department huang zauh thar zel a ni tiin Department a thawktute chu thahnemngai leh zuala thawk turin a beisei thu a sawi a. Sawrkar hnathawk reng rengin an thawhchhan ber chu an mahni tan a ni lova, mipui tan ber a ni tih hi an hriat reng a ngai a, chutiang rilru pua an thawh chuan ram hi a than ang turin a thang thei anga chu chuan ram hi a tichangkang thei dawn a ni, a ti. Sawkar a inthlakin, a hmasaa Sawrkarin a lo kalpui tawh leh a tuipui te Sawrkar mek a ten an hluihlawn chuan kuthnathawktuten an tuar nasa ber thin a, chuvangin kuthnathawktute tana hmalakna tha leh an hlawkpui thei chi thil te chu kalpui zel tha a tih thu a sawi.

Office thar hawnna hi Pu Hualthanga Chhakchhuak, Director, LR, S & WC Department chuan hun kaihruaiin Pi K. Lalrinzuali, IAS, Secretary, LR, S & WC Department in lawmna thu a sawi a, Pu F. Lalrinawma, Addl Secretary, LR, S & WC Department in lawmthu sawiin hun a khar a ni. He hunah hian SEDP hnuaia Rubber & Allied Crops Development Board a member te pawh an tel a ni.

Rubber Development Office thar hi Pu Chiranjib Banik, Assistant Development Officer, Rubber Board of India in a thutchilh dawn a ni.

Mizoram pumah hian chhungkaw 2927 in rubber an ching mek a ni.