No.7827/2020-2021

Saitual, 18th March, 2021 : Vawiin chhun khan Pu R. Lalzirliana'n Saitual Venglaiah Saitual District DRDA Office a hawng a, Rural Development Minister Pu Lalruatkima, Pu R. Zarzosanga, RD Secretary leh Rural Development department hotu pawimawhte bakah Saitual khawtlang hruaituten he hun hi an hmanpui a ni.

DRDA office thar lawmna puala inkhawm Govt. Saitual College Auditorium-a buatsaihah khuallian niin Minister Pu R. Lalzirliana chuan Saitual district in DRDA office an neih theihna tura theihtawp chhuaha tan lakpuitu Chief Minister Pu Zoramthanga leh RD Minister Pu Lalruatkima chungah lawmthu a sawi a. DRDA office chu district danga DRDA office kum tam tak lo awm tawhte nen khaikhin nghal mai a rem dawn lo tih sawiin, District mipuite tawiawmna leh hriatthiamna an mamawh hle dawn a ni, a ti a. DRDA staff te leh District mipuite chu malsawmna ni tawn tura thawkho turin duhsakna a hlan a ni.

Khuallian chuan Saitual district Deputy Commissioner leh Addl DC te chu Rural Development lama tawnhriat ngah tak an nih avangin a thlamuanthlak tih a sawi a, District thar hawn hnu a sawrkar department hawn parukna a nih thu sawiin reiloteah District Research Officer's office leh District Sericulture Officer's office hawn theih beisei a nih thu a sawi bawk.

Khualzahawm Rural Development Minister Pu Lalruatkima pawhin Mizorama DRDA office pakuana ni tura Saitual district DRDA office hawn a ni ta chu district mipuite a lawmpui thu a sawi a. Sawrkar laipuiin rural development a ngaih pawimawh avangin India rama Flagship programme lian ber MGNREGS pawh RD hnuaiah a dah a, hei hi India rama employment generate nasa ber a nih bakah, khawvela inhlawhfa inziahluh tamna ber a ni a. Heng bakah hian thingtlang hmasawnna tur programme tam tak DRDA hnuaiah mumal leh awmze nei zawkin a kalpui theih tawh dawn a ni, a ti.

Khualzahawm Pu Ruatkima chuan district hmasawnna turin DRDA in hma a la tan dawn a ni a, theihtawp chhuahin tan an la dawn a, hengah hian mipuite tawiawmna a pawimawh em em a, a tirah beisei angin thil a kal tluang nghal pur pur thei lo a nih pawhin dawhtheihna leh hriatthiamna nen, tha taka a thawktute lo finchhuah thin turin district mipuite a ngen a ni.

Saitual district DRDA office tharah hian APO, AE, AO leh JE telin staff 20 velin bul an tan dawn a, Saitual District Addl DC Pi Margaret Lalrinawmi Fanai chuan Project Director hna hi a kawp rih dawn a ni.

Saitual district DRDA office hi Saitual Venglaiah mimal inluahin bultan a ni a. Ministerte leh Rural Development department officialte hian Saitual District Administrative Complex hmun tura ruahman chu tlawhin DRDA office sakna tur hmunte an en nghal a ni.

Saitual District ah hian Assembly Constituency pathum - Tawi, Chalfilh leh Lengteng a awm a. RD Block 2 - Phullen leh Ngopa awmin, Village Council 44 a awm a ni.

DRDA office thar lawmna inkhawm hi Saitual district bawrhsap Pu VL Hruaizela Khiangte-in a kaihruai a, Commissioner & Secretary, Rural Development department Pu R. Zarzosanga pawhin thusawiin, Pi Ethel Rothangpuii, Project Director, DRDA, Aizawl District in lawmthu sawinain a khar a ni.