No.3614/2020-2020

Tuipuiral lirnghing tuar khaw hrang hrang a tlawh hnuah Power Minister Pu R. Lalzirliana chuan vawiin khan Saitualah HSLC leh HSSLC zirlai ti thate lawmpuina leh MSU District Headquarters, Saitual hawnna programme a hmanpui. He programme, Govt Saitual College Auditorium a neih hi Pu Lalhmunsiama, President MSU District Hqrs., Saitual chuan a kaihruai a, Saitual DC Pu V. L. Hruaizela chu Khualzahawm a ni.

Minister Pu R. Lalzirliana chuan zirlai kal khawmte chu an hma hun atana rahbi pakhat an chuan kaina a nih chauh avangin hei aia nasaa taimak chhuah lehzual turin a chah a. Sawrkar hna leh hna dang dang pawh a van tawh em avangin, midang aia thawhrim leh hratlak a tul thu a sawi. Kalkhawmte chu sawrkar hna chauh tin zawn lova mahni kea ding thei tura thiamna tak tak paw chhuak turin a chah a, hna tih tlak thawk thei tura thiamna nei thei turin kalkhawmte a fuih a ni.

Pu R.Lalzirliana chuan zirlai pass tharte chu nun bul tan an nih hre renga an hlawhtlinna chu chapo nan emaw midang chunga leng anga inngaihna atan hmang lo turin a chah a. An miziaa a thalai theuh vawng nung zel tur leh thudik tantu, thu diklo leh belhchian dawllo vawrhdarh laka inveng thiam turin a chah a. Khawi hmunah pawh awm se, an theih ang anga sawrkar thawhpui thiam tur leh ram hmasawnna tura mi tangkai tak ni turin duhsakna a hlan a ni.

HSLC distinction leh first division a pass mi 35 (town chhung 16 leh town pawn 19) hnenah leh HSSLC distinction leh first division a pass mi 34 (town chhung 28, town pawn 6) te hnenah lawmpuina hlan a ni.

Vawiin programme-ah hian MSU District Headquarters, Saitual hawnna hun hman nghal a ni a. Saitual DC Pu VL Hruaizela bakah MSU General Headquarters President Pu Vanlalliana Khiangte, MSU Sub Headquarters Saitual Senior Advisor Pu Zoremsiama te pawhin thu an sawi a ni.

Programme thawh hnihnaah Career Guidance and Motivational talk hun hman nghal a ni a. Pu R. K. Hnuna, Director, Zo Career Solutions chu resource person niin hun hlawkthlak tak an hmang a ni.