No.1278/2021-2022

Dated Champhai, the 7th July, 2021: Vawiin chawhma khan Law & Judicial Minister Pu T.J. Lalnuntluanga chuan Champhai DC Conference Hall-ah Agriculture leh a kaihhnawih department hrang hrang hotute kawmin, an hmalakna leh hmachhawpte zau taka sawihona hun a neihpui.

Pu T.J. Lalnuntluanga chuan Covid-19 hri leng inkhuahkhirhna kalpui mek vangin hmasawnna ruhrel khawih leh hmachhawp neih mekte hlen a har rih thu sawiin, thlen tawh chin atanga hmalakna leh hmachhawp awmte inhrihriat leh, bawhzui ngaite ngaihtuahho nise ti a thutkhawm koh a nih thu a sawi a. District Administration leh Department hotu viak tha tak Champhai District-in a nei chu fakawm tiin, an lakah mipuiten beiseina sang tak an nei tih hriaa theihtawp chhuah zel turin a chah a. Tih dan phung pangngai ang ngawr ngawra kal reng bik lovin, hun tawn leh thil inthlak danglam ang zela inherdanglam thiam turin department hotute chu a fuih bawk.

Agriculture leh a kaihhnawih department dangte chu mipui nawlpui mar dek, an eibel leh inghahna ber berte an nih hlawm thu leh ngaihpawimawh an nih thu tarlangin, mipui ten hamthatna an hmuh theih turte leh an tangkaipui turte hrilhhriat leh hmalaksak kawngah tun aia nasa zawka penchhuah a ngai a ni, a ti a. District leh state dangte a tih danphung thate zirchianga, Champhai District sik leh sa mil remchang turte hlawk zawka kalpui tura tanlak zel a tul thu a sawi a. Department mamawh leh hmalakna tura tulte chak zawka bawhzui a nih theihna turin department hotute chu mamawhte ziaka a hnena thlen turin thurawn a pe bawk.

District Bawrhsap Pi Maria C.T Zuali chuan intodelhna tham buh leh bal thar chhuah theihna Champhai District-in a neih thu sawiin, tam leh hlawk tham thar turin tun aia taima lehzuala thawh a ngai a ni, a ti a. Mipui tana thawk tura tih sawrkar hnathawkte nasa lehzuala tan la turin a chah bawk.

Meeting-ah hian Champhai Leilet tihchangtlunga, hlawk zawka buh thar a nih theih dan turte leh hmalak tawhnate sawiho niin, thil thar hlak leh awmze nei zawk hmalakna kalpui a tul takzet thu tarlan a ni a. Leilet lei thur leh al zawng soil testing mithiamte kaltlanga zirchiana, a tul anga lei tihthat leh siam rem dante ngaihtuah nise tih a ni a. Theihna nasa tak nei Champhai District chhunga Agriculture leh a kaihhnawih department anga hmalak theihna hrang hrangte sawiho niin, state mai bakah sawrkar laipui scheme thlenga chhawr tangkai thei turin District Road Map mumal leh project-te siama bawhzui nise tih a ni a. Loneitu leh ran vulhtu ten awlsam zawka mithiamte phone hmanga an rawn zung zung theihna turin helpline siam nise tih a ni bawk.

He hunah hian Agriculture department bakah A.H & Vety. atangin Integrated Piggery Farming, Boar Semen Station, Sial vulh leh African Swine Fever chungchang hmalakna ngaihthlak a ni a. Horticulture department hnuai scheme hrang hrang hnuaia thei leh thlai chin kawnga hmalaknate,  Covid-19 special assistance maintenance fund hmanga Irrigation & Water Resources department hmalaknate leh FOCUS project kaltlanga hmalaknate department hotute hnen atanga ngaihthlak a ni a. Hmachhawpte zau taka sawiho niin, bawhzui dan turte ngaihtuahho a ni bawk.

Vawiin chawhnu khan Law & Judicial Minister hian District Hospital Champhai leh Urban Primary Health Centre (UPHC), Champhai Vengtharte tlawhin thawktute kawmna hun a nei a. Hriselna kawnga an thawhrimna leh inpekna fakawm a tih thu sawiin, harsatna an neihte a hnena hrilhhriaa mamawh an neihte thlen hrehlo turin a chah a. District Hospital Champhaia hman tur PPE full set 30 leh Glove-te a hlan a ni.

Law & Judicial Minister hian vawiin chawhnu vek khan Champhai District Journalist Association member-te chu DC Conference Hall-ah kawmin khawtlang tana mamawh leh tul hrang hrangte a sawipui a.  Pi Lallianthangi W/o Valbuanga (L), Champhai Zotlang hnenah kum 100 tlin lawmpuina Citation leh thilpek a hlan bakah, Covid-19 hrikai damlo enkawltu neilo pitar, a dam chhuah thlenga tlawmngaia awmpuitu Nl. C.T Ramnunmawii D/o Thanglûaia (L), Champhai Ruantlang hnenah Tawlhloh puan a hlan bawk.