Vawiin khan State Level Sub-Committee on Fire Prevention chu an Chairman Pu TJ Lalnuntluanga, Forest Minister hovin Secretariat Conference Hall-ah an thukhawm.

Kum tina tih thin angin Fire Prevention Week hman leh ni se tiin a hun atan February thla kar hnihna, ni 10 atanga 15 an rawt a, a hawnna hun hi February ni 10 ah neih ni se, tiin an rel. Fire Prevention Week thupui atan “Kangmei chhuak tur veng la, i ram chhan rawh” tih an thlang a. March ni 15 hma in lo leh huan hal zawh vek ni se, an ti. District thar pathum Hnahthial, Saitual, Khawzawl tiamin District tinah kangmei ven kawnga District tin te hmalak dan enfiah leh ni se tiin a enfiah tur atan tlawmngai pawl hrang hrangte ruat an ni a. Ram kang ven kawnga titha ber District pathum leh District tina khua (village) titha pathumte hnenah Fire Prevention Award hlan leh ni se tiin an rel bawk.

Mipui mimir hriatah kangmei a chhuah lo nana ven ‘fire prevention’ pawimawhzia uar lehzuala puanzar ni se tiin print leh electronic media lamah thuchah leh zirtirna pek chhuah te, school leh college ah thuchah chhiarchhhuah te, poster leh banner tar te, khaw hrang hrangah VC leh tlawmngai pawlte nen awareness programme hman ni se, tih te an rel a. Social media hrang hranga thehdarh tur animation siam ni se an ti bawk. An thu rel hrang hrang te hi State Level Fire Prevention Committee pawmpui tura thlen leh tur a ni.

He meeting-ah hian kum hmasaa an hmalak tawh dan te thlir letin kum 2019 chhung khan kangmei ven kawngah District tina hmalakna a tha thawkhat viau niin an hria a, lo leh huan hal hun bituk zawm lo erawh an la tam hle. Kangmei ven kawnga kum kaltaa District titha lawmman dawngtu pakhatna atanga pathumnate chu Champhai, Lawngtlai leh pathumna dawngtu pahnih awmin Kolasib leh Mamit District te an ni.