No.1215/2020-2020

Vawiin khan Pu TJ Lalnuntluanga, Minister of State for Law, Transport & Forest department leh Champhai South bialtu MLA nibawk chuan a bial chhung fang chhunzawm zelin, HSLC exam result tihchhuah taka hlawhtlinna changte hnenah lawmpuina a hlan. Covid-19 hrileng darh zel tur venga ramri Tiau kaia rammu mekte pawh tlawhin Thosilen leh a chiahna hlo a hlan nghal a ni.

Pu TJ Lalnuntluanga chuan Zirlaite'n theihtawp an chhuah avanga hlawhtlinna an chan lawmpuina hun hlimawm tak hman ani ta chu Zirlaite vang liau liau ani tiin, khawvela thil hmuhnawm ber hlim hmel Zirlaite-ah a hmu leh amah ngei pawh a hlim hle thu a sawi a. In tin tlawhchhuaka a mal mala chibai buk tura kal duh mahse tunlai boruak tawn mek nen a inmil loh miau avangin social distancing leh mask vuah ngaipawimawh chungzela lawmpuina hun hman anih tak thu a sawi a. A bial chhung Bethel Mission School atanga exam beitu zinga mi Manngaihsangi'n HSLC result chhuak taah Top ten (Rank 10) nihna a hauh thei chu chhuanawm a tih thu a sawi a. Remchang hmasa berah Zirlaite pualin Career Guidance Counselling huapzau leh tangkai tak huaihawt tuma rilru sen mek anih thu sawiin, a thiam thei apiang an dingchhuak vek bik lova, theihtawp chhuaha bei hram hramte chu hlawhtlinna tlanga dingte an ni, a ti a. Zirlaite chu nakin hunah eizawnna ngelnghet an neih hunah pawh midangte tana malsawmna nih tum turin a chah a. Matric pass chhuah chu zirna khawvela kailawn hmasa anih avangin inthlahdah a thianglo a, titha lemlo te tan pawha hnualna tur a awm loh thu leh amah ngei pawh HSLC examination chu third division-ah a pass thu sawiin, Zirlaite chu an theihna hriaa indahhniam biklo tur leh mite tanpuina hmanga khaichhuah beisei lova mahni indah chungnungna thinlung pu tlat thin turin a chah a ni.

Champhai South bialtu MLA chuan Zirlaite chu an tih that dan inang lo fur mahse a pawimawh ber chu nakin zela zirna sang zawk belh hunah mahni chhungkaw chawmzo tur leh hnam tana chhawrnahawm ni thei tura tumruhna leh beih hram hramna neih hi a ni, a ti a. Zirlaite chu eng hna mah thawh hreh nei lo tur leh hna sang leh hniam thliar chuang lova mahni kut kea dinga intodelh tum tlat tura fuihin, mahni theuh kan intodelh hian State Economy a chawisang thei ani, a ti a. Zirna kawnga harsatna tawk an awm chuan a hnena thlen hreh lo tura chahin a tul ang zela hmalakpui a inhuam thu a sawi a, an kalzelna turah duhsakna a hlan a ni.

Dr. Lallawmkima, DIPRO Champhai pawhin Zirlaite fuihna thu sawiin, rilru leh tih takzeta lehkha zira mahni zirlai theuhte bel taka thiam tum turin a fuih a. Thiante nena zirlai sawiho leh thiamlohte zirtirtute hnena thlen vat thin turin a chah a. Nakin zel ngaihtuah chungin mi te aia danglam ni tura thahnemngai taka lehkha zir turin a fuih nghal bawk a ni.

Minister leh Champhai South bialtu MLA hian vawiin hian Zirlai hlawhtlinna changte Electric Veng 18, Zion Veng 8, Vengthar 24, Bethel Veng 30, New Champhai 20, Tlangsam 14, Zotlang 46 leh Ruantlang 13 te hnenah thilpek Dictionary bu a hlan a ni.

Vawiin vek khan Minister Pu TJ Lalnuntluanga hian Covid-19 hripui leng mek laka kan him theihna tura ramri a rammu mek Tlangsam Tiau kai hmun hrang hrang Bulfek Kai, Fuanchhuah leh Zimpui kai duty te SYMA hruaitute nen a hmunah kalchilhin an tlawh a. Ramri veng tute mahni inlum chhuahsana ram leh hnam himna tura thawktute chungah Sawrkar aiawhin lawmthu a sawi a. SYMA Secretary Pu PC Lalrawnliana pawhin fuihna thu sawiin, bialtu MLA te uapna leh ngaihsaknaah lawmthu a sawi a ni. Minister hian an mamawh tur hmanrua Thosilen leh a chiahna hlo a sem nghal a ni.

Law Minister hi Dr. Lallawmkima, DIPRO Champhai, Pu Thanliana Hauhnar, ACF bakah Sub-Hqtrs YMA (SYMA) Champhai hotute leh khawtlang hruaitu te'n an tawiawm a ni. Ruahman dan chuan naktuk lam hian bial a fan chhunzawm anga ramri a duty te a tlawh dawn bawk a ni.