No.737/2020-2021

Law & Judicial, Parliamentary Affairs, Transport leh Forest department changtu Minister, Champhai South bialtu MLA nibawk Pu TJ Lalnuntluanga chuan vawiin lam khan Indo-Myanmar ramri khua VLTF-te leh Tiau luikama ralvenga rammu mekte a tlawh chhunzawm zel a. East Tuipui biala awm New Hruaikawn VLTF, Hruaikawn VLTF, Bulfekzawl VLTF leh hemi huamchhunga Tiau kam duty post 8 te chu chawhma lam khan a tlawh a. Hemi hnu hian Champhai South bial ramri dep a tlawh a, Zokhawtharah tukthuan eiin, Zokhawthar playground siam mek a hmunah a enfiah a. Zokhawthar VLTF leh Melbuk VLTF-te tlawh lehin, heng ram huamchhunga Tiau kama duty post hrang hrang awm mek zinga duty post 12 te chu Official-te nen an tlawh bawk a ni.

Pu TJ Lalnuntluanga chuan ramri dep VLTF leh Tiau kam ralven buk hrang hranga rammute a tlawhnaah thusawiin, ram leh hnam tana theihtawp chhuaha rammu mekte inpekna, tawrhna leh harsatnate hriatpuia zirchiang tur leh sawrkar aiawha thinlung taka lawmthu sawi tura lokal anih thu a sawi a. Ramri vengtute mamawh thlente pawh a rang thei ang bera chhawpchhuah a nih theihna tura hmalak zel ani ang, a ti a. Mipuite chu tu dang tan maha thawk kan ni lova, mahni, chhungkua, ram leh khawvel himna tura inpe a thawk kan ni tih inhrethar leh turin a chah a. Ramri vengtute chu rinawm, thuawih leh taima taka hotute zai ngai thiam chunga thawk tura fuihin, Covid-19 hripui beih kawngah thu inhmu lo leh buaina awm chang pawha inhrethiam tlang hram hrama, ram leh hnam himna dah pawimawh hmasa fo turin a chah a. Covid-19 hripui avanga tawrhna leh vanduaina thleng chuan inzirna leh fimkhurna thlen se, intodelhna lamtluang zawhna kawnga hnarkaitu pawimawh tak, pialral faisa ringa awm duhna thinlung put tlat thinna thlak danglamtu nise a duhawm hle ang, a ti. Hripui leng thinin ram sum leh pai dinhmun leh ei leh bar thlenga a nghawng thin vangin hun harsa leh khirh tawh mek lai mah nise, nakin huna awm zel dan tur ngaihtuah chunga intodelh thei tura thahnemngai taka hnathawh a tul thu a sawi bawk.

Law Minister leh Champhai South bialtu MLA ni bawk chuan Covid-19 hripui dona kawnga harsatna lian tham, hmun dang thlenga darh hriat nuam lo tur ang chi a awm lo chu lawmawm tiin, harsatna awmte hotute hnena thlen zel turin a chah a. Hripui leng tur chu hriat lawk leh duhthusama lo inpuahchah lawk theih anih loh thu sawiin, ram ropui leh thil ti thei zawkte pawh an buai em em a, hripui laka invenhim kawngah Pathianin Mizoram Sawrkar hotu lu ber Chief Minister leh a kaihhruaite finna a pe a, nasa taka lo inhmakhua lawkin hmun dang aia hmain lockdown kan puang a, Airport leh ramri luhka hrang hrangte pawh khar hmasa ber pawl niin, hmun dangte awh em em Local/ Village Level Task Force din vat niin, an hmalakna hnuaiah kan la him zel a ni, a ti a. Pi leh pute hunlaia pachhia leh chanhai zawkte khaichhuak tura an puih thin angin, midangte tanpui tura inhuam reng tur leh midangte entawntlak nih tum tlat turin mipuite a chah a. Ramri depa chengte chu chhia leh tha hriatna hmang tangkai thiam tur leh Social media hmang thiam tura fuihin, thu belhchian dawllo leh midang fuihpawrh thei zawnga thuchhuah siam lo tura chahin, Covid-19 dona kawngah boruak tha tak hnuaiah zo zemawi, midangte khaichhuah tumna rilru pu ran chunga tan la sauh sauh turin a chah a ni.

Ramri dep khuaa khawtlang hruaitute leh ramchhan nana rammu mekte chuan ramri ralven bukte a hmun ngeiah Mizoram Sawrkara Minister leh amah tawiawmtu District Official te'n an tlawh chu lawmawm an tih thu an sawi a. Thahnemngai taka ramrite uluk taka ven anih thu sawiin, hripui a lo luh lohna tura thawhhona chuan rah tha tak a chhuah ngei an beisei thu an sawi a. Ram leh hnam tan theihtawp an chhuah chhunzawm zel dawn thu pawh sawiin, Mizoram mipuite thlamuang taka awm turin an chah bawk a ni.

Minister leh amah tawiawmtute hian nimin lamah Champhai South leh North biala VLTF leh Tiau kam duty post-te an tlawh kual nual tawh a. Vawiin lam hian East Tuipui biala duty post hrang hrang 8; Police, ramri dep khuate, SYMA Covid-19 Squad leh Assam Rifles-te ven mek Hruaikawn rama Tuidir Kai, Bulfekzawl rama Sih mit Kai, Khawthlir Kai, Hnahthial Kai, Phaizau Kai leh New Hruaikawn rama Thliarpui Kai leh a chhehvela mite an tlawh a. Chawhnu lamah Zokhawthar Tiau Main Gate chhak leh thlanga duty post hrang hrang 11; Police, ramri dep khuate, SYMA Covid-19 Squad leh Assam Rifles-te ven mekte an tlawha, Melbuk Tiau kai Ngawibuk zaua duty-te an tlawh hnuah Mualkawi rama Solid Waste Processing Unit siamna tur hmun an tlawh bawk a ni.

Pu TJ Lalnuntluanga hi Pu Mark Lalthanliana, Bawrhsap; Pu Rex Zarzoliana Vanchhawng, SP; Pu Lalzorama, SE, P&E; Pu Laldingliana Hrahsel, EE, I&WRD; Pi R.Lalnunkimi, BDO; Dr. Lallawmkima, DIPRO; Pu Jonathan Lalhruaitluanga, Forest Ranger, Champhai bakah khawtlang hruaitute leh Chanchinbumite'n an tawiawm a ni.

Champhai District Myanmar ramri dep Vaikhawtlang leh Khuangthing inkarah hian Police 90 te'n duty post 31 an siam bakah YMA duty post 80 vel a awm meka, mamawh leh tul anga tihdanglam thin a ni.