593/2022-2023
Aizawl, the 24th May 2022 : Environment, Forest & Climate Change enkawltu Minister Pu TJ Lalnuntluanga, Chairman, Mizoram State Biodiversity Board ni bawk chuan nimim chawhnu khan Environment, Forest & Climate Change Department leh Mizoram University tangkawpin International Day for Biological Diversity 2022 puala programme Education Seminar Hall, MZU Campus a an buatsaih chu khuallian niin a hmanpui a. MZU Registrar Prof. Lalnundanga chu khualzawhawm niin programme a hmanpui bawk a, Dr. K. Pachhunga MLA pawh a tel a ni.

Environment, Forest & Climate Change Minister Pu TJ Lalnuntluanga chuan Biodiversity chu nitin khawsak leh dam khawchhuahna atana thil tul ber te zinga mi anih dante sawiin kan mamawh tinreng chaw, damdawi, boruak tha, tui leh hmanraw chi hrang hrang kan hmuhna hnar ber chu Biodiversity hi a ni, a ti a. Mizoram chu khawvela biodiversity hausakna hmun Indo Myanmar Biodiversity Hotspot huam chhunga telin nungcha leh thilnung tam tak chhinchhiah a nih tawh rualin chhinchhiah loh tam tak ala awm avangin zir mite leh mithiamte tan tih tur leh zir tur ala tam thu a sawi.

Minister chuan Biodiversity chu kawng hrang hrangin kan hloh nasat thu sawiin, a chhan tlangpui nia langte chu mihring pung zelin ram kan mamawh belh avang te, hmasawnna kawng hrang hrang atana hmalakna te vang hi a ni a. Hei bakah kan lo neih dan thalo tak avang leh thilnungte chunga kan rilru put dan fuh tawklo avang hian nunna nei thil chi hrang hrang te an chereu nasa hle, a ti a. Chuvangin nungcha tinreng te, thilnung dangte leh ramhmul chi hrang hrang te hi engtin nge kan humhalh anga, a chhe mek pawh kan siamthat ang tih hi kan tun dinhmunah chuan thil pawimawh leh ngaihtuah ngai ber a ni ta hial awm e tiin heng humhalhna kawngah hian mitin in mawhphurhna kan neih thu a sawi.

Biodiversity humhalhna kawngah Sawrkar pawhin Department hrang hrang kal tlangin hma a lak dante sawiin chung zingah chuan National Park leh Wildlife Sanctuary te Tiger Reserve te bakah Community Reserve pawh engemaw zat siam ani tawha. Chungah chuan ruahmanna fel tak neiin, mithiamte kaihhruaina hnuaiah kawng hrang hrangin hma lak mek ani a. Hei bakah hian Biodiversity Management Committee pawh khawtin deuh thawah din a ni tawh a. Board kaihhruaina in Board tin te hian anmahni khua theuhah anni hian thil chhinchhiahna Peoples biodiversity register fel tak neiin an huam chhung theuhvah hma anlo la ve mek bawk ani, a ti.

International Day for Biological Diversity 2022 chu nimin Sunday ah a tlak avangin thawhtan ni khan Department in a hmanna an buatsaih a. Programme hi Pu Jitendra Kumar, IFS, Principal Secretary leh PPCF ni bawk chuan a kaihruai a. Nungcha humhalh pawimawh zia Prof. N Senthil Kumar, Dean, School of Life Sciences, MZU in thuhmaah a sawi a. MZU mithiam 3 ten paper an present a; chungte chu ‘Impact of Biodiversity loss on Zoonotic diseases’ (Prof. G. Gurusubramaniam, Professor, School of Life Sciences); ‘Urban biodiversity and lifestyle change to prevent loss of biodiversity’ (Dr. David C. Vanlalfakawma, Asst. Professor, Dept. of Zoology) leh ‘Endemic and rare species of Mizoram herpetofauna’ (Prof. H.T. Lalremsanga, Dept. of Zoology) te an ni.

Mizoram hi khawvela Biodiversity-a hausa hmun 36 te zingah tel in Indo-Myanmar Biodiversity hotspot huam chhungah a tel ve a. Mizoramah, Botanical Survey of India chuan kum 1997 khan rawn zirin ram hmul chi hrang hrang 2358 a chhinchhiah a, Zoological Survey of India pawn nungcha engemaw zat a chhinchhiah bawk a ni. Kum 5 kalta atangin Mizoramah nungcha chi thar engemaw MZU leh PUC mithiamten hmuchhuakin an hmuh chhuah belh mek zel a ni.