No.2351/2020-2020

Vawiin khan Law and Judicial, EF&CC, Transport leh Parliamentary Affairs department changtu Minister Pu TJ Lalnuntluanga, Champhai South bialtu MLA nibawk chuan a bial chhung Zokhawthar khua tlawhin, tunhnai lirnghingin chhiatna a thlen dante a hmunah kalin Official-te nen an enfiah a. A theih leh remchan dan ang zelin tanpuina sumfai leh chhawmdawlnate a hlan a ni.

Pu TJ Lalnuntluanga chuan lirnghing vanga vanduai thlak taka chhiatna thlengte enfela, chhiatna tuarte hnema thlamuan tur leh dan anga hmalak theih dan turte Official-te hruaia zirchiang an nih thu a sawi a. Lirnghing vanga thlabara hrehawm tawrhnate chu a hriatthiampui thu leh amah ngei pawhin a tawrhpui thu sawiin, State sawrkar hotu lu ber Chief Minister-in lirnghing tuarte leh chhiat tawhnate a tawrhpuiin a ngaipawimawh em em a, India ram Prime Minister leh Disaster changtu Home Minister-te nen pawh inbe rawn vatin thil awm dante an sawi tlan thu tarlangin, Sawrkar laipui lamin a tul anga chhawmdawl a inhuam thu a sawi a ni.

Champhai South bialtu MLA Pu TJ Lalnuntluanga chuan a hmun ngeia chhiatna thlen dan leh chhawmdawl theih dan tur dapa zirchianna neih anih thu sawiin, thuneitu sang zawk lama thil hmuh dan kimchangte thlen tum ani tiin, a tul ang zelin sawrkarin theihtawp a chhuahpui tur thu a sawi a. Covid-19 vanga ei leh bar zawn kawnga Zokhawtharin harsatna a tawh leh an ei bar zawnna bulpui ber a chah kara phunnawi mai lova theihtawp an chhuah chu fakawm tiin, sawrkarin an harsatnate hriain a ngaihven zel ani, a ti a. Hripui vanga sawrkar sumpai dinhmun a that loh karah pawh ram sumpai dinhmun ngaihtuah chungin hmasawnna lamtluang pawh hriselna chungchanga hmalak rualin a theih ang anga kalpui zel tum ani, a ti bawk.

Champhai Bawrhsap Pi Maria C.T Zuali pawhin State Disaster Relief Fund hnuaiah khuarel chhiatna vanga vanduaina thlengte tanpuina chu dan dinglai anga pek thin anih thu leh chhiatna thlen dan dinhmun report-te mithiam ten kalchilha an zirchian mek zel thu sawiin, a tul ang zela chhawmdawl leh tanpuinate buaipui ani ang, a ti a. Chhiatna thleng report zingah inhumhimna leh chenna bera hman mimal inchhiate ngaihpawimawh hmasak anih thu a sawi bawk.

Zokhawthar VCP Pi Lalmuanpuii chuan Zokhawthar khuaa chhiatna thlengte ngaipawimawha tlawhtu Law Minister Pu TJ Lalnuntluanga leh Official te'n a tak ngeia Zokhawthar tlawha chhiat tawhna an en vangin an chungah khaw aiawhin lawmthu a sawi a. Pu Ramsangzuala, Secretary, Village Level Disaster Management hnen atangin chhiatna thlen dan kimchang ngaihthlak niin, tun thlenga in report zingah chhe nasa zual 10 leh chhe nelnual 36 a awm thu a tarlan bakah in report tlem a zawng an awm belh a rin thu a sawi bawk.

Law Minister leh District Official-te hian lirnghing vanga chhiat tawhna hrang hrang; Police Station, Bazar, Anganwadi Centre, PCI Zokhawthar Kohhran Biak In, Playground Pavillion, Zokhawthar Middle School, Zomi Baptist Church, St. Joseph School, Zokhawthar Secondary School bakah mimal In chhe nasa zualte an tlawhkual a. Heng bakah hian District Disaster Co-ordinator leh Engineer te'n chhiatna report lutte tlawhchhuaka enfiahin an zirchiang bawk a ni.

June Ni 22, 2020 (Thawhtanni) zing dar 4:10 a Lirnghing Ritcher Scale 5.3 a na, Champhai district chhung Khawbung leh Samthang inkar atanga intan nia hriat chuan Indo-Myanmar ramri dep khaw hrang hrangah chhiatna thlen nualin, nunna chan erawh an awm lo a ni.

Minister Pu TJ Lalnuntluanga hi Pi Maria C.T Zuali DC, Pu Rex Zarzoliana Vanchhawng SP, Pu Lalnunfela Chawngthu SDO Sadar, Pu Lalduhthlana DFO, Pu Laldingliana Hrahsel EE, I&WRD, Dr. Lallawmkima DIPRO, Pi R.Lalnunkimi BDO, Pu R. Lalramliana SDO PWD Building Sub-Division leh Official dang ten an tawiawm a ni.