2193/2023-2024

Champhai the 6th October, 2023 - Vawiin chawhma khan Zokhawthar Middle School chuan sawrkar school atana hlan kai (provincialised) lawmna hun an hmang a.He lawmna hun hi bialtu MLA leh Transport, EF&CC etc changtu Minister Pu TJ Lalnuntluanga chuan a hmanpui a ni.

Lawmna inkhawm Headmaster in charge Pi Lalparmawii kaihhruaiah Pu TJ Lalnuntluanga chuan thu sawiin, hun rei tak kalta atanga mipui lo nghahhlel tawh Zokhawthar Middle School provincialize tih hlawhtlin ani ta chu hmasawnna rahbi pawimawh tak a ni tiin, kawng hrang hranga zirlaite, zirtirtute leh mipuite ti phur thartu anih ngei a beisei thu a sawi a. Zokhawthar Middle School chuan Doctor, MBA, Lawyer leh hna pawimawh hrang hrang chelh an chherchhuak thei chu an chhuanawm takzet a tih thu sawiin, zirtirtute thawrimna leh an zirlaite atana an inpekna avangin an chungah lawmthu a sawi a. Champhai District-a school ruhrelte ti hmasawn turin School Education Department te nen theihtawpa tang hovin, School Education Department Director leh Department thawktu dangte nen pawh inspection neih tawh anih thu a sawi a. Zokhawthar Middle School building sak tharna tur pawh ruahman fel tawh niin, tender tih fel tawh a ni a, school sak hna tan thuai anih tur thu pawh a sawi a.

A sawi zelnaah Minister chuan Zokhawthar border trade chu kan economy innghahna hmunpui ala ni zel dawn a, chumi tur chuan sawrkar pawhin ruhrel bun belh kawngah te, inkalpawhna siam that kawngah te hma ala zel a, Zokhawthar border trade ti hmasawn tur hian SASCI kaltlangin cheng nuai 1500 hmanga hnathawh mek a ni a, hei hian kawng hrang hrangin hmasawnna ala thlen zel dawn a ni, a ti a. Melbuk leh Zokhawthar inkar kawng siam that nan SASCI sum cheng nuai1350 ruahman fel tawh a ni, a ti bawk. Heng Sawrkar hmalaknate a hlawhtlin ngei theihnan mipuite thawhho puiah a sawm a ni.

Zokhawthar Middle School hi kum 1995 khan khawtlangin a din a. Tun dinhmuna zirlai 207 an awm mek a ni.

Minister hian vawiin vek khan Zokhawthar Field siam that tur a tlawh a. Zokhawthar Field retaining wall hi SASCI sum cheng nuai 30 a sak tur a ni a. Field chei that hna hi DRDO sum cheng nuai 10 kaltlangin thawh a ni dawn bawk a ni.

Minister hi Champhai DRDO PD Pu Lalrinawma, PWD Sr SDO Champhai North Sub Division Pu Hmingthanmawia leh official dangte bakah khawtlang hruaitute leh mipuiten an tawiawm a. Field a hnathawh dan tur te chu a hmunah enin an rel hova, hna tlo leh tha tak hun tiam chhunga zo hman ngei tura tan la zel turin Minister chuan a chah a ni.a