Vawiin chawhma khan Vanapa Hall-ah Mizo Students' Union buatsaihin kumin HSSLC exama Arts, Science leh Commerce subject-a Mizo zirlai ti tha zual pathum theuhte chawimawina hun hman a ni a, Pu Zodintluanga  Information & Public Relations Minister chu khuallian a ni.

Pu Zodintluanga chuan Mizote hi hlimhlawp (entertainment) lawmna khawvelin min run nasa em em mai a, hei hian kan rilru leh ngaihtuahnate a kaihhruai nasain atawpah erawh chuan retheihna leh manganna thlentu mai an ni thin a ti a ;  Zir thiamna hi hringnun rahbi kal zel atana pawimawh tak mai a nih avangin kan hlamchhiah thiang lova ; hetianga MSU ten zirlaite thatna leh hmasawnna tur atana hma an la hi lawmawm a tih thu sawiin zirna chawisanna kawnga tanpui tura a inhuam reng thu a sawi bawk a ni.

 Minister chuan zirlai chawimawite chu fuihin tun hi a bul tanna chauh a la ni a, hlawhtlinna tak tak chu nakina lo la thleng tur a ni a, chumi thleng tur chuan hah, thawhrim leh tawrhchhelna a ngai a ni a ti a, an upat hunah an thiamna pung zel hi Mizote leh Mizoram tan tangkai taka hmang turin duhsakna a hlan nghal bawk a ni.

MSU-te pawh an ke pen uluk tura a duh thu sawiin zirlaite hamthatna tur nilo thildanga hun tam zawk an hman chuan zirlaite bawkin an tuar dawn a ni a ti bawk.

Khuallian hian Arts, Science leh Commerce subject-a ti tha ber te hi lawmman thilpek a hlan theuh bawk a ni.

He chawimawina inkhawm hi MSU Vice President Pu R.B. Lalmalsawman a kaihruai a ni.