Mizoramah a vawi khatna atan Zero Waste Management kalpui a ni dawn ta a. New Economic Development Policy (NEDP) hnuaiah he hnathawhna tur cheng nuai 15 hu work order chu Pachhunga University College (PUC), Aizawl Theological College (ATC), Academy of Integrated Christian Studies (AICS) leh Higher and Technical Institute of Mizoram (HATIM) hotute hnenah Pu Zodintluanga, Minister, UD&PA chuan a office chamber a programme buatsaihah a hlan.

Minister chuan, zero waste management-in a tum chu recycling (hmanraw hlui ti riral lova hman nawn), waste disposal (bawlhhlawh paih dan) leh waste management (bawlhhlawh sawngbawl dan) te a ni a. Zero Waste Concept hi Mizote tan chuan thil thar ni mah se khawiah emaw bul tan a ngai si a. Heng institute-te hi  campus tha tak nei, hmun danga bawlhhlawh paihlova anmahni ram chhung theuhah an bawlhhlawh tih riralna tur bawlhhlawh sawngbawlna siam tura beisei an ni a, he project hi tute emaw inhlawhna tur ni lovin anmahni ta anih angin anmahni ngeiin a siam hna leh buaipui hna zawng zawng an thawk dawn a ni, a ti. Zero Waste project hnuaiah hian Green Waste an siam chhuah zawng zawng composting hmanga lei tha siam chhuah a, Recycle theihte recycle a, hman nawn theih loh (inert materials) te fel takin an phum bo dawn a ni, Pu Zodintluanga chuan a ti a. “India ram khawpui Delhi colony pakhat New Moti Bagh-ah chuan kum 2017 atang khan Zero Waste Management Project kalpui tan turin a inruahman a. He zero waste management project hnuaiah hian he colony chhûnga bawlhhlawh zawng zawng chu an colony pel lovin an chingfel dawn a ni,” tih sawiin UD&PA Minister chuan Mizoramah pawh a bul tan nan kan zirna in (institute)chhuanawm tak takte  phungbawmah sawmin an ni hian Mizoram mipuite tan entawn tur tha tak an siam theih ngei sawrkar chuan a beisei hle a ni, a ti.

UD&PA Secretary Dr C Vanlalramsanga pawhin thu sawiin, ”Zero Waste Management lama bul tanna kan neih theih nana ngaihtuahna seng peih UD&PA Minister kan nei hi a lawmawm a, kan pu berin mi rama an thil tihte Mizorama tih ve theih dan tur a ngaihtuah hi UD&PA Department-a thawktute pawh kan lawmin kan phur em em a. Khawvel thang chho zelah mihringten kan mamawh (consumer products) kan siam chhuahna lamah hnawk leh bawlhhlawh tam tak a siam tak avangin kan nunphung leh khawsakphung pawh nasa takin a tibuai a. Mihringten kan mamawh kan titlem thiam si lo leh thil siam chhuaktuten an thil siamte hralh chhuahna tur (outlet) an zawn mawlh mawlh lai hian chung thilsiam mipui nawlpuiin kan leite chuan kâwr leh bâwm te neiin hman ruah leh hman zawh an nih tawh hnuah chuan a tih riralna tur ngaihtuah chu hna hautak tak mai a ni. Hmasawnnain min hrût tel ve zel avangin chutiang khawvelah chuan Mizote pawh kan lut chho mek a, kan thil leina kawr leh bawm te hian kan hman zawh hnuah min tihnawk tawh hle a ni. Ram changkang zawkah chuan hetiang harsatna chinfel nan hian zero waste management hi an kalpui a. Hei hian a tum ber chu bawlhhlawh a lo tlem nan thil (consumer products) hman tlem leh, kan hman chhunte pawh pawn lama paih chhuak lo a, kan hmanna hmuna tihriral dan neih hi a ni. Heng kan institute thlan chhuahte pawh hian he project hi a neitu an nih hria a, thahnemngai taka an kalpui kan beisei a, midangte tan pawha chona tha tak a nih ngei kan ring tlat a ni,” a ti.

Zero Waste Management bul tanna tur chungchang hun hman a nih hma hian Krismas vuakveta veng hrang hrangten an veng chhung kâwn an chei lawmman semna neih a ni a. Pu Zodintluanga chuan mipui nawlpui lenvahnaa hmuhnawm en tur an neih theih nana Veng thahnemngaiten an veng chhung an chei thin chu lawmawm a tih thu a sawi a. Krismas hi Kristiante hunpui a nih avangin Veng hrang hrangten mahni insengsoa kawn an chei thin hi tih zel chi a nih thu pawh Minister hian a sawi bawk a ni. Pakhatnaah Tlangnuam, pahnihnaah Chaltlang, pathumnaah Durtlang te an ni a, pakhatnain pawisafai Rs.1,00,000.00, pahnihnain Rs.70,000.00 leh pathumnain Rs.50000.00 a keng tel a; consolation prize Rs.20,000.00 theuh Mission Veng, Republic Vengthlang leh Electric Veng hnenah hlan a ni bawk.

Kawn Chei Lawmman semna leh Zero Waste Management Project programme-ah hian UD&PA officers bakah PUC, ATC, AICS, HATIM hotute leh Kawn Chei Lawmman dawngtu Veng hrang hrang hruaitute an tel a ni.