314/2023-2024

Aizawl The 4thMay 2023: Nimin khan DoNER Secretary hovin DoNER Ministry hnuaia hnathawh mek (project) hrang hrangte thlirhona leh zirchianna chu Aijal Club Conference Hall-ah neih a ni a. Chief Secretary bakah DoNER Ministry hnuaia hnathawh kalpuitu Department Secretary leh Director-te an tel a ni.

Mizoram Chief Secretary Dr. Renu Sharma chuan DoNER Ministry hnuaia hnathawh zirchiang leh thlirpui tura lokal DoNER Secretary leh amah lo zuitute lawmna thu sawiin, hna tha taka kalpui a nih theih nana an inpeknaah lawmthu a hrilh bawk a ni. Mizoram sawrkarin DoNER Ministry chu a chhawr tangkai hle tih tarlangin hmasawnna tam tak hmuh theihin a awm tawh a ni a ti. India sawrkarin ‘Act East Policy’ a kalpui mek chu a hlawhtlin zel theih nan DoNER Ministry chuan hmun pawimawh tak a luah a ni tiin, Mizoram bakah hmarchhak state-te tan hmasawnna rahbi thar a thlen thuai a beisei thu a sawi bawk a ni.

Pu Lalmalsawma Pachuau, Secretary, Planning & Programme Implementation chuan DoNER Ministry hnuaia Mizoramin project a kalpui mekte a tarlang a. Tun dinhmunah avaiin project 28 kalpui mek niin, Non Lapsable Central Pool of Resources (NLCPR) 6; North East Special Infrastructure Development Scheme (NESIDS) 17; Prime Minister Development Initiative in North East Region (PM-DevINE) 2; North East Road Sector Development Scheme (NERSDS) 3 te an ni a. Heng project-te hi Public Works Department bakah Health & Family Welfare, Public Health Engineering, Power & Electricity, Tourism, District Council & Minority Affairs (DC&MA), Urban Development & Poverty Alleviation (UD&PA) Depatment-te kaltlanga thawh mek niin, North East Council (NEC) hnuaiah project 46 Mizoram chuan a kalpui mek bawk a ni.

Pu Lok Ranjan, Secretary, Ministry of DoNER chuan Mizoram-in DoNER hnuaia project a kalpui hrang hrangte chuan hmasawnna rah tha a chhuah a beisei tih sawiin, State hmalakna chu a tha thawkhat hle a ni, a ti. State-in project a kalpuinaah harsatna a neih ang angte chu a rang lama chingfel turin hmalak a inhuam thu a sawi bawk. DoNER hnuaia project tam zawk chu hmasawnna ruhrel (infrastructure) tan hman a nih thu tarlangin mipui vantlangin chan tam zawk an neih theih nan social sector leh eizawnna (economy) chu ngaih pawimawh mek a nih thu leh helama ngaituahna thar seng turin a chah nghal bawk a ni.

DoNER Secretary chuan sawrkar laipuiin DoNER Fund a tihpun tur thu sawiin, Mizoram pawhin DoNER atanga sum a hmuh thin let thum a hmu thei tawh dawn a ni a ti a; kum kal mek (financial year) ah Mizoram chuan cheng vaibelchhia 600 vel a hmu thei dawn niin a sawi. Tun hma chuan hriatthiamnaa 'advance' pek thin erawh a awm thei tawh dawn lo a, bill siamfel a Utilization Certificate(UC) thehluh a nih hnuah chauh sum hi pekchhuah a nih tawh dawn avangin DoNER atanga sum hmu tha tur chuan state tinte tanlak thar a ngai a ni a ti. Ministry of DoNER chu hmasawnna tur atana project khawih theih chin nei a ni tiin Pu Lok Ranjan chuan zau zawka hmasawnna Mizorama a awm theih nan Central Ministry hrang hrangte dawr thiam turin sawrkar hotute a hrilh bawk a ni.

Pi Biakthansangi Hrahsel, Dy. Adviser-cum-Dy. Secretary, Planning & Programme Implementation Department chuan lawmthu sawiin nimina DoNER  project thlirhhona hun hnung a khar a. Chief Secretary-in zanriah a buatsaih chu kilho nghal a ni a. DoNER Secretary hi Joint Secretary, Deputy Secretary leh Senior Consultant, DoNER ten an lo tawiawm a ni.