Mizoram Police chuan a hnuaia tarlan ang hian thuchhuah a siam a ni:

Chanchinthar belhchian dawl lo te, mipui tithlabar thei te, chi leh chi, mimal leh pawl inkara boruak chhia siam thei te hi mi thenkhat hlawkna chauh um ten an thehdarh theih avangin heng thilte hi thehdarh atan a pawi thei em tih finfiah hmasa lo chuan thehdarh lo turin leh fiamthuna atana hmang lo turin kan ngen a. Thiamna lamah kan sang zel a, dan leh thupek zawm kawngah pawh kan harh thar zel a tul a. Mipui pungkhawm zingah harhfim lo leh au ring apiang thu awiha mipuiten tlangchil hmanga pawi khawih mai an awm thin a. Khawtlang hruaitute leh dan kengkawhtute ngaichang lova che mai an awm theih avangin thil pawi tak, siam that theih loh a thleng fo thin a ni. Heng pumpelh tur hian ngaihtuahna fim tak hmanga dan kengkawhtu magistrate leh police thu awih chunga thawhho thiam a tul hle a. Insawisak leh tlangchil phei chuan police-te hnathawh leh hnuchhuina kawng a tibuai zawk thin a ni. Heng thil avang hian mi thenkhat pawisawi lo ten an tawrh phah a, nunna hial an lo chan tawh avangin Supreme Court chuan July Ni 17, 2018 khan thuchhuah a siam. Chumi bawhzui chuan Mizoram sawrkar chuan district tina SP-te chu nodal officer-ah ruatin amah pui turin task force din a bawhzui mek a. Task Force-te hian district chhungah thudik lo thehdarh avanga mipuite tharum thawh theihna emaw buaina chhuak theite thlirin hmalak dan turte an rel thin a, hma chak taka lak a ni.

Kan hma lawka krismas leh kumthar lo awm turah pawh mipuiten hlim leh thlamuang taka hun kan hman theih nan sawrkar khap halpuah leh halmawi, silailem a mu kap chhuak thei tumahin zuar lo tur leh hmang lo turin kan inchah nawn leh a ni.