Election Commission of India-in Mizorama MP Election 2014 inthlan ni tur atan naktuk April ni 11, 2014 (Zirtawpni) a rawn ruat tawh angin Lunglei District huamchhunga Polling Station 175-ah vote thlak a ni dawn a. Election Office, Lunglei District chuan MP Election 2014-a VVPAT chungchanga mipuite hriattur leh mipuite hnena ngenna hetiang hian thuchhuah a siam a ni :

Kumin MP Election 2014 atan hian Lunglei khawpui chhung polling station-ah te VVPAT hman tur a ni a. Hei hi 'Voter Verifiable Paper Audit Trail' tihna a ni, miin a vote duh ngei a vote a ni tih a hriat nana ruahman a ni.

Vote thlakna compartment-ah khawl pahnih - Ballot Unit leh VVPAT Unit - a lo awm ang a. Ballot Unit-ah hian Candidate te hming leh an chhinchhiahna a lo intlar ang a, kan vote duhna zawna hmehna button-ah hmeh tur a ni a. Chu veleh VVPAT Unit-ah chuan i vote thlakna candidate hming leh symbol te chu VVPAT slip-ah a rawn in chhuchhuak (print) ang a. VVPAT bawm chhungah a vote-tu in a endik (verify) theih turin second sarih (7 secs.) a intar ang a, chumi hnuah a chhunga bawmah amahin a tla ang. Chu veleh Control Unit-ah ri a rawn awm ang a, i vote i tlak fel tihna a ni.

VVPAT Slip hi lakchhuah theih a ni lova, voter hmuh theih turin a bawm chhungah, darthlalang phenah 7 secs. atan a rawn intar dawn a ni.

Boruak muanawm tak leh thawhhona tha tak hnuaia MP Election 2014 neih a nih theih nan mipuiten kan chanvo ngai pawimawh a, vote thlak theuh turin kan inngen a ni.