Ni thum thanga Tawi biala khaw hrang hrang fanga zinchhuak Home Minister Pu R. Lalzirliana chu nimin khan Aizawl a lo thleng a. A zin chhung hian Keifang te, Rulchawm te, Ruallung te, Mualpheng te, Tawizo te, Maite te, Dilkhan leh Lungpher khuate a tlawh a ni.

Home Minister chuan khaw hrang hranga amah lo hmuaktu mipuite hnenah thuchah sawiin, “Mizoram sawrkar chu a thutiamah a rinawm a, mipuite hnenah NLUP cheng nuai khat leh a aia tam deuhte-a sem a intiam ang ngeiin sem mek a ni a; Krismas hma hian sem chhunzawm leh ngei tumin theihtawp kan chhuah mek a ni.” a ti. Pu R. Lalzirliana chuan, “Democracy ramah sawrkarna siamtu leh neitute chu mipuite an nih ang ngeiin, Mizoram sawrkar pawhin budget-ah NLUP hmangin mipuite chan tur a dahsak a; he pawisa hian mipuite hnen a thleng ngei bawk a ni. Planning Commission-in NLUP atana cheng vaibelchhe 2700 min ruahmansak hi kum nga chhung hian kan sem zo hman dawn lo zawk a ni” tiin mipuite chu NLUP hmang tha turin a chah a. “Pathianin Israel fate kha khawizu leh hnutetui luanna ram pek a tiam a, nimahsela, chu ram luah tur chuan thi leh thau pawlha an thawh hmasak a ngai a, rinawm leh huaisen taka beitute chauhvin ramtiam chu an luah a ni. Chuti ang bawk chuan, Mizoram luahtute pawh hian NLUP hmang hian kan ram hi ram nuam takah kan siam thei a; thuawi taka kan awm a, rim taka kan thawh bawk chuan he rama thilthate hi kan tan Pathianin min dahsak a ni” Pu R. Lalzirliana chuan a ti. Home Minister chuan Mizoram-a sawrkar dinglai chu mipuite tawngtaina rahchhuah a nih avangin Pathianin nasa taka mal a sawm thu pawh sawiin, “Roreltute hi Pathian ruat an nih chuan mipuite pawhin roreltute thuawi thiam a pawimawh a; ram enkawl tur pawhin mipuite hian mahni thutiama ding thin leh mi rinawmte kan thliarthiam tur a ni” a ti bawk.

Home Minister hian nimin khan Lungpher khuaa cheng nuai 6 senga sak YMA Library chu a hawng a; he library hi Rajarammohan Roy Library Foundation sum senga sak a ni. Lungpher khua hi Aizawl district chhunga library nei changtlung ber 3 zinga thlan a ni a; Mizoram puma library tha 5 thlanchhuah zingah pawh a tel nghe nghe a ni. Home Minister chuan a zinvahna khaw thenkhata zirlaite nena an lo hmuak chu tha lo a tih thu sawiin, zirna kaihhnawih thilah chauh lo chuan Minister-te hmuak tura zirlaite pun hi sawrkarin a khap thu a hrilh nawn a. Krismas leh kumthar lo thleng turah tumah halpuah leh halmawi hal lo tura chahin, Lal Isua chauh rilrua vawng chunga Kirsmas leh kumthar hmang turin duhsakna chibai a buk a ni.